Bilärdä «Sälät» forumınıñ icadi smenası tämamlandı ← kire kaytirga

Kiçä Bilärdä XI Xalıkara «Sälät» yaşlär uku-ukıtu forumınıñ ikençe smenası - ICAT BILÄR FORUM (Tworçestwo/Arts) tämamlandı.

Smenanıñ yomgaklau könendä muzıka, teatr, biyu yunäleşläre buença laboratoriyalär eşçänlege näticäläre täkdim itelde.

Elektron muzıkant häm songrayter Ayrat Nurkaew citäkçelegendäge laboratoriyadä katnaşuçılar Sälät gimnınıñ yaña yañgıraşın täkdim ittelär. Muzıkant häm kinokompozitor Nikita Sawelew balalar belän kinofilmnarga muzıka yazu östendä eşläde. Muzıkant häm Rossiya kompozitorlar berlege ägzası Marat Fäyzullin katnaşuçılar belän bergä tatar xalık cırlarınnan popurri icat itte.

Tinçurin teatrı akterı häm rejisserı Ilnur Garifullin balalar belän bergä G.Tukay köndälekläre buença spektakl eskizı buldırdı. Ikençe laboratoriyaneñ eskizı X.Taktaşnıñ «Mokamay» poemasına bagışlana. Balalar belän teatr häm kino rejisserı, dramaturg häm akter Bulat Minkin da şögıllände. Spektaklneñ öçençe eskizın tatar riwayatläre häm äkiyatläre buença rejisser, akter, ukıtuçı Ruslan Abrarow citäkçelegendäge törkem tözede.

Bıelgı yañalıklarnıñ berse - «kinobiyu» laboratoriyase. Proekt nigezenä yort ruxın küçerü yolası yattı. Laboratoriya citäkçese - biyuçe, rejisser häm xoreograf Ewgeniya Turuşkina. Icat törkeme kontseptsiya uylap taptı, biyu kuydı häm film töşerde.

«DOBERMAN» komandası katnaşuçısı häm xoreografı Ewgeniy Yuşkow balalar belän eksperimental biyu yunäleşendä eşläde. Katnaşuçılar tatar folklorı nigezendä programma äzerlädelär häm tatar mifologiyaseneñ iñ tanılgan geroy obrazların başkarıp karıy aldılar.

Xoreograflar, biyuçelär häm ukıtuçılar Marsel häm Mariya Nuriewlar balalar belän «Tantsteatr» yunäleşendä eşlädelär. Tamaşanıñ nigezenä törki bizäklär alıp, katnaşuçılar anı säxnädä gäüdäländerergä omtıldılar.

Muzıkal yunäleşne cırçı, aktrisa, wokal buença ukıtuçı Zärinä Wildanowa citäkläde, teatr yunäleşe G.Kariew isemendäge Tatar däülät yaş tamaşaçı teatrı akterı häm rejisserı Liliya Nurel citäkçelegendä uzdı. Biyu yunäleşe citäkçese - xoreograf Wenera Galimowa.

Laboratoriyalär belän berrättän forumda Tatarstannıñ, Rossiyaneñ aldıngı belgeçläre ostaxanälär häm lektsiyalär uzdırdı.

Bu el yañalıklarınıñ berse - kollektiw citäkçeläre öçen maxsus «Ostaz» uku-ukıtu programması buldıru. Proekt kısalarında balanı şäxes bularak tärbiyaläü, dustanä mönäsäbätle kollektiw buldıru, anı üsterü temalarına bagışlangan sessiyalär häm ostaxanälär uzdı.

«Canlı Sälät» (SeletLive) turıdan-turı efirlar studiyase üz eşen däwam itte.

Icadi smena kısalarında teatr häm kino akterı, «Kadetstwo», «Elki», «Papinı doçki», «Kremlewskie kursantı» kinoproektları katnaşuçısı Aleksandr Golowin belän icadi oçraşu bulıp uzdı.

Alda balalarnı «Sälät» forumınıñ öçençe smenası kötä. 11 iyuldän 16 iyulgä kadär sälätle balalar öçen traditsion «Sälät» festiwal-forumı - Cotsial künekmälär Bilär Forum (Sotsialnıe nawıki /Soft Skills) oeştırıla. Soft Skills - professional dairädä alga taba da uñışka ireşü öçen möhim sotsial künekmälär. Smenası kısalarında ostaxanälärne Tatarstannıñ äydäp baruçı galimnäre, ekspertları häm biznes-trenerları ütkäräçäk.