Bilärdä «Sälät» forumı tämamlandı ← kire kaytirga

Bilärdä XII Xalıkara «Sälät» yaşlär uku-ukıtu forumınıñ yomgaklau smenası – Aldıngılar Bilär Forum tämamlandı. Ul «Aldıngılar xäräkäte» Rossiya balalar häm yaşlär xäräkäte belän belän berlektä uzdırıldı.

Smenanıñ yabılu tantanasında Tatarstan Respublikası mägarif häm fän ministrı urınbasarı Alsu Äsädullina, Tatarstan Respublikası Räise yardämçese, «Aldıngılar xäräkäte» balalar häm yaşlär gomumrossiya ictimagıy-däülät xäräkäteneñ töbäk bülege Sowetı citäkçese Timur Söläymanow häm «Sälät» Yaşlär üzäge direktorı Aygöl Gabdraxmanowa katnaştı.

«Bu – izge cir, biredä härçak iñ aktiw yaşlär cıela. «Aldıngılar xäräkäte»neñ aktiw eşçänlegen näk menä biredä başlau da aerım mägnägä iya. Iñ kızıksınuçan balalarnı berläşterä torgan mäydançık buluı şäp. Dönyanı yaxşırtu telägegezgä tugrı kaluıgız häm üzegez artınnan da şundıylarnı iyartüegez öçen räxmät sezgä», – dide Alsu Äsädullina.

«Bergä cıelganda, bez üzebez öçen mömkinleklär moxite buldırırga sälätle. Anıñ yardämendä respublikabıznı üsterä alabız. Tizdän ilebez şäp, belemgä omtılgan balalar xäräkäte – zur «Aldıngılar xäräkäte» belän berläşäçäk. Bez älege xäräkätkä mömkin kadär kübräk keşe kuşıluın häm alarnıñ bu xäräkätneñ moña kadär kürelmägän, küñellärenä citmägän mäydançık ikänen añlawın telibez. Çönki bu – balalar häm olılar berläşä torgan urın», – dip bilgeläde Timur Söläymanow.

Altınçı smena däwamında katnaşuçılar «Aldıngılar xäräkäte»neñ 12 yunäleşe buença eşläde. Alarnı belem birü, fän, xezmät häm hönär, mädäniyat, ireklelek, watanpärwärlek, sport, sälamät yaşäü räweşe, media häm kommunikatsiyalär, diplomatiya, ekologiya häm turizm buença Rossiya spikerları ukıttı. Forumnıñ töp – belem birü eşçänlegennän kala, smena katnaşuçıları üzlären sport häm mädäni programmalarında da sınadı.

Forumga kunak bularak «Närsä? Kayda? Kayçan?» uenınıñ elitar klubı ägzası Nikita Starun kilde. Ul katnaşuçılar belän oçraştı häm intellektual turnir uzdırdı.

Forumda «Canlı Sälät» (SeletLive) studiyasennän turıdan-turı efirlar ütkärelde. Alarnı härkem «Sälät»neñ WKontakte häm YouTube räsmi akkauntlarında karıy aldı.

Altınçı smenanıñ yabılu tantanasında «Sälät» berläşmäse aktiwistların büläklädelär. Xezmätlärenä xörmät yözennän liderlarga şämäxä töstäge futbolkalar tapşırıldı. Monnan tış, aktiwistlar Sälät berläşmäsen nıgıtuga kertkän öleşe öçen I, II häm III däräcädäge Sälät bilgelärenä laek buldı.

Şunısın da bilgeläp uzıyk: altınçı smena yabılu belän XII Xalıkara «Sälät» yaşlär uku-ukıtu forumı tämamlandı. Bıelgı cäyge sezonda 6 profille smena uzdı: Hönärlär Bilär Forum, Icat Bilär Forum, Karera texnologiyaläre Bilär Forum, Media Bilär Forum, Mäglümati texnologiyalär Bilär Forum, Aldıngılar Bilär Forum.

Alarda barlıgı 14 000 bala katnaştı (8000 – oflayn-formatta, 6000 onlayn-formatta). Forum däwamında barlıgı 930 belem birü sessiyase ütte. Alarnı Rossiyaneñ törle poçmaklarınnan kilgän 280 spiker uzdırdı.

Forumda tatar tele häm tarixka bagışlangan yunäleş zur urın alıp tordı. Biredä balalar Bilär tarixı belän tanıştı, küp tarmaklı tel moxitenä çumdı. Böten mädäni, kiçke çaralar, şulay uk belem birü programmasınıñ ber öleşe tatar telendä uzdı. Forumda altı smena däwamında «Sälät dulkınında» radiosı eşläde, anıñ pleylistı «Sälät» xäräkäte häm tatar başkaruçıları cırlarınnan tözelde. Territoriyaneñ bizäleşe: çatırlardagı mäglümat, mäglümat stendları da tatar telendä äzerlände

«Sälät» üz wakıtında 65 keşene tuplagan ber smenadan başlandı, ä bıel cäyge smenalarnıñ 30 nçı sezonı uzdırıldı. Şuşı wakıt eçendä «Sälät» Rossiya töbäklärendä, Tatarstanda däwamlı traditsiyagä äylände. 2024 elda «Sälät» üzeneñ 30 ellıgın bilgeläp uzaçak. Berläşmäneñ yubileena bagışlangan çaralar kiläse elga planlaştırıla.

Xalıkara «Sälät» yaşlär uku-ukıtu forumı Tatarstan Respublikası Xökümäte, TR Yaşlär eşläre ministrlıgı häm TR Mägarif häm fän ministrlıgı yardäme belän uzdırıla.