Äydamanlık yulınıñ möhim etabı! ← kire kaytirga

Här elnı äydaman bulırga teläüçe yaşlär «Äydamannar mäktäbe»n tüzemsezlek belän kötep ala. Ul Sälät berläşmäseneñ möhim proektlarınnan berse. Proektnıñ maksatı – cäyge Sälät alannarın gamälgä aşıru öçen professional komandalar formalaştıru. El däwamında äydamannar törle yunäleştä eş alıp baralar: sälätle balalar belän eşli belü, komandada üzeñne kürsätü, Sälät traditsiyalären öyränü, printsipların belü, sälätlelär öçen törle çaralar uylap tabıp uzdıru. «Äydamannar mäktäbe»ndä, 18 yaştän alıp, yugarı häm urta maxsus uku yortlarında ukuçı, moña kadär «Äydamannar mäktäbe»n ütmägän, tatar telen kamil däräcädä belgän yaşlär katnaşa.
«Äydamannar mäktäbe» sigez etapta ütkärelä: çittän torıp saylap alu, äñgämälär; Sälät yortında onlayn häm offlayn däreslär; onlayn test uzu; küçmä mäktäptä katnaşu öçen äñgämä; küçmä mäktäpne uzu; mäktäp imtixannarın tapşıru; citäkçelär belän äñgämä; «Sälät» yaşlär üzäge DBU direktorı belän äñgämä.
«Äydamannar mäktäbe - 2025» küçmä sessiyasenä baraçak abıy häm apalarnıñ isemlege äzer! Bu elnı ul 26 nçı gıynwardan alıp 30 gıynwarga kadär «Yoldızlı» bazasında uzaçak. Küçmä sessiyadä katnaşuçılarnı Sälät eşçänlege belän tanışu, sälätle balalar belän eşläü üzençäleklären öyränü häm başka bik küp faydalı häm kızıklı çaralar kötä. Uñışlar siña, bulaçak äydaman!