«Cәләт» һәм «Алдынгылар хәрәкәте» үзара дустанә мөнәсәбәт булдыра ← кире кайтырга

Биләрдә форумның алтынчы сменасы – «Алдынгылар Биләр Форум» дәвамында Татарстан Республикасы Рәисе ярдәмчесе, «Алдынгылар хәрәкәте» балалар һәм яшьләр гомумроссия иҗтимагый-дәүләт хәрәкәтенең төбәк бүлеге Советы җитәкчесе Тимур Сөләйманов белән очрашу узды. Ул хәрәкәт эшчәнлеге һәм планнары турында сөйләде, катнашучыларның сорауларына җавап бирде.

«Без балалар хәрәкәте төзибез, ә анда яшүсмерләр белән бергә олылар да роль уйный. Ләкин әгәр олылар үзләре ничек мөһим дип саный, шулай эшләсә, ә сез тамашачылар сыйфатында гына булсагыз, берни дә барып чыкмаячак, – дип мөрәҗәгать итте яшүсмерләргә Тимур Сөләйманов. – Әлеге хәрәкәт эшчәнлек һәм мәгънә ягыннан да нигезле, чын булырга тиеш. Без бер ай яки бер елдан соң аның нинди булачагын белмибез. Быелгы җәйдә Татарстанда гына да 30 мең бала «Алдынгылар хәрәкәте» чараларында катнашты. Хәрәкәт бик масштаблы һәм бөтен ил буенча — Россиянең 89 төбәгендә формалаша».

Татарстан командасы «Алдынгылар хәрәкәте»н сакчыл караш белән булдырырга тели. Бу республика балалар һәм яшьләр хәрәкәтләренең үсеше өчен кирәк. Мисал өчен, «Алдынгылар Биләр Форум» уза торган Биләрдә «Cәләт» хәрәкәте катнашучылары «Алдынгылар хәрәкәте» белән таныша. Шулай итеп, «Cәләт» һәм Россия балалар һәм яшьләр хәрәкәте үзара дустанә мөнәсәбәт булдыра. «Алдынгылар хәрәкәте» барлыкка килү «Cәләт»не тагын да көчлерәк итсен», – ди Тимур Сөләйманов.

Очрашу катнашучылары «Алдынгылар хәрәкәте» символлары белән дә танышты: бу — махсус билге, беләзек һәм хәрәкәткә багышлау вакытында әйтелә торган сүзләр.

Республикадагы «Алдынгылар хәрәкәте» лидеры хәрәкәт исеменең татарча тәрҗемәсенә дә тукталды:

«Без хәрәкәтнең исемен «беренчеләр» дип түгел, ә «алдынгылар» дип тәрҗемә иттек, чөнки аның асылына нәкъ шушы мәгънә салынган. Беренче урын күп була алмый, тик һәркем алдынгы була ала. Шуңа да без – «Алдынгылар хәрәкәте», без – алдынгылар, без – беренче».

«Алдынгылар хәрәкәте» – фикердәшләр хәрәкәте. Үз чыгышында Тимур Сөләйманов моның турында берничә тапкыр ассызыклады.

«Мин хәрәкәткә һәр теләгән кеше кушыла алуын һәм «Алдынгылар хәрәкәте»нең көчәюен телим. Катнашучылар биредә үзләрен уңайлы хис итә алсын өчен, аны сакчыллык белән генә булдырырга, үстерергә кирәк. «Алдынгылар хәрәкәте» һәркем өчен ачык булырга тиеш», – дип тәмамлады очрашуны җитәкче.