Сәләт клублары таң калдырды ← кире кайтырга
«Сәмрух» премиясенең сайлап алу туры кысаларында, Татарстанның төрле районнарыннан, Самарадан килгән балалар үз клубларын тәкъдим иттеләр. «Ел клубы» исеме өчен «Сәләт-Бөгелмә», «Сәләт-Самара», «Сәләт-Азнакай», «Сәләт-Яшел Үзән» һәм «Сәләт-Әлмәт» клублары көч сынашты.
Бөгелмә шәһәре яшьләре үзләренең казанышлары хакында сөйләделәр, сәләтле балалар тормышында Сәләт берләшмәсенең әһәмиятен аңлаттылар. Клуб активисты Арина Быкова сүзләренчә, Сәләт – камилләшү мәйданчыгы ул.
«Шәхси үсешемдә клубыбызның роле зур. «Сәләт-Бөгелмә» инде 3 ел дәвамында актив эшләп килә. Шәһәребездә интеллектуаль-күңел ачу форматындагы чаралар үткәрәбез: «Түбәтәй», «Сүз баттл», «Нәрсә? Кайда? Кайчан?», «Бугафест», дебатлар, һ.б. Сәләт турында башкаларга да бик теләп җиткерәбез. Әле күптән түгел генә Оренбург өлкәсенең Әсәкәй авылында булып кайттык. Ачык ишекләр көне форматында 7-10-нчы сыйныф укучыларын Сәләт дөньясы белән тыныштырдык, сөрәннәр өйрәттек, җәйге аланнарга чакырдык», - дип уртаклашты Арина.
«Сәләт-Яшел Үзән» клубы рәисе Тимерхан Шәйхетдинов үз клубы турында 3 телдә сөйләде. Шуңа да аның чыгышы бик уңышлы килеп чыкты. Афәрин!
«Безнең клуб әле күптән түгел генә, узган елның сентябрендә генә эшли башлады. Шушы вакыт аралыгында мәктәп һәм шәһәркүләм дәрәҗәдә 5 күңел ачу чарасы үткәреп өлгердек. Клубыбыз Яшел Үзәннең 16-нчы мәктәбе администрациясе һәм «Мы вместе» хәйрия фонды белән актив хезмәттәшлек итә. Активистларыбызның да уңышлары байтак. Алар арасында иң яктысы булып Халыкара «Тамчы-шоу» бәйгесендә җиңүебезне атар идем», - ди клуб рәисе Тимерхан.
«Сәмрух» премиясендә катнашу өчен Самарадан махсус зур делегация дә килеп төште. Самараның «Яктылык» мәктәбе директоры Радик Рәфгать улы Газизов, завуч Фәридә Гомәр кызы Хәмидуллова, «Сәләт-Самара» сменасы директоры, тәрбия эшләре буенча директор урынбасары Инзилә Рәлиф кызы Гыйззәттулина җитәкчелегендәге яшьләр Сәләт йортында фикердәшләре белән аралашты. Бүләкләр, рәхмәт сүзләре, җылы теләкләр күп булды.
«Сәләт – безнең бүгенгебез, киләчәгебез. Берләшмәбезне зур шатлык белән тәкъдим итәбез. Барыгызга да зур рәхмәт!» - дип җиткерде Радик Рәфгать улы.
Сәләт медиа-мәктәбе укучысы Альбина Сысоева