Кичә Биләргә «Сәләт» форумына «Нәрсә? Кайда? Кайчан?» элитар клубы әгъзасы Никита Старун килде. Белгеч балалар белән очрашты, интеллектуаль уен күнекмәләре белән бүлеште һәм Алдынгылар Биләр Форум сменасы катнашучылары өчен турнир уздырды.

Никита Старун интеллектуаль уеннарда 10 елдан артык катнаша. Форумлылар белән очрашуда ул уеннарда, шул исәптән «Нәрсә? Кайда? Кайчан?»да, команда эшен яхшырту һәм нәтиҗәлелекне арттыру өчен кулланылган техникалар турында да сөйләде. Аның сүзләренчә, ул күбрәк уйнаган саен, уеннарда гына түгел, тормышның төрле өлкәләрендә кулланып булган инструментлардан активрак файдаланганын әйтте.

Белгеч сүзләренчә, вакыт кысалары турында да истә тоту мөһим. Уенда да җавапны табу өчен билгеле вакыт бирелә. Моннан тыш, тыңлый белү һәм бирелгән мәсьәләдә нәрсәне чишәргә кирәклеген үзеңә гади тел белән аңлату кирәк. Мәгълүм булган фактларны аңлап, җавап табарга комачаулый торганнарыннан читкә куя белү мөһим. Белгеч әйтүенчә, бер генә яссылык белән чикләнмичә, киңрәк фикер йөртү дә кирәк.

«Сорауның формасын истә тоту да зарур. Һәм шул ук вакытта «Без эзләгән әйбер шушымы соң ул?» дип үзеңә сорау бирү дә мөһим. Әгәр сезгә уйларга 10 секунд бирелә икән, сез бер төрле җавап кайтарачаксыз, әгәр 10 минут бирелсә – җавабыгыз бөтенләй башка булачак. Бу бар җирдә дә шулай. Һәр вакыт берәмлеге һәм өстәмә ресурслар безгә үз карарыбызны кабул итү өчен ышанычны арттыра. Ресурсларны оптималь рәвештә сарыф иткәндә, оптималь карарга килү ноктасын табу мөһим. Бу уенда да, тормышта да бар», – дип бүлеште Никита Старун.

«Нәрсә? Кайда? Кайчан?» уенының бурычы – билгеле бер вакыт эчендә команда белән дөрес җавапны табу. Без төрле әйберләр өчен шушындый оптималь җаваплар табарга телибез. Мисал өчен, команда яки уку проектын ясаганда, яки хезмәттәшләр белән эш мәсьәләсен хәл иткәндә», – дип билгеләде ул.

Бер-береңне ишетә һәм тыңлый белү – командада эшләү өчен әһәмиятле күнекмә. Кеше белән күзгә-күз карап аңлаша, аралаша һәм фикерләреңне туплый белү мөһим.

Моннан тыш, уенда берәр нәрсә аңлашылмаса, «Ни өчен?», «Нигә?»  сорауларын бирергә курыкмаска кирәк. Икенче кешенең аңлатуы, аның фикер сөреше башкаларга файдалы була һәм көтелмәгән ачышларга китерә ала.

Шуңа өстәп, командадагы һәр катнашучының көчле якларын файдалана белү кирәк. «Шушы сыйфатларны кулланып, һәр кешегә үзенә туры килгән мәсьәләне йөкләү мөһим», – диде кунак.

Белгеч баш мие резервы турында да сөйләде. Бу – командада беренче һәм икенче темптагы уенчылар булу. Беренче темп уенчылары сорау тәмамлануга ук җавапларын яудыра башлый, икенче темп уенчылары өчен бераз уйлау, «тизлекне җыяр өчен» вакыт таләп ителә.

Никита Старун катнашучылар белән очрашу барышында республика турындагы хис-кичерешләре белән дә бүлеште. Аның Татарстанга беренче килүе, һәм ул Казанны Париж белән чагыштырды. Аңа «Черек күл» паркы янындагы француз стилендәге өйләр Европа шәһәре турында искә төшереп тора икән. Биләрдә – форумда кунак татар сүзләрен дә өйрәнә башлаган.

«Минем белән бер командада уйнаучы Тимур Кафиатуллин безне татар теленә өйрәтә башлады, суперблиц буенча тренировканы, татар сүзләрен кулланып, оештыра», – диде «Нәрсә? Кайда? Кайчан?» уенының элитар клубы әгъзасы.
Очрашу тәмамланганда, белгеч интеллектуаль уеннарда катнашу өчен иң әһәмиятле киңәш белән уртаклашты.

«Без бу җиргә ләззәт алыр өчен килгән. Шуңа да процесстан тәм табу мөһим. Минемчә, һәркем үзе өчен зур кыйммәткә ия булган һәм үзе теләгән эшен башкарырга тиеш», – диде ул.

Кич белән уенчы смена катнашучыларына интеллектуаль турнир уздырды. Биредә укучылар алган белемнәрен практикада сынады.

Исегезгә төшерәбез, Халыкара «Сәләт» яшьләр уку-укыту форумының йомгаклау сменасы «Алдынгылар хәрәкәте» Россия балалар һәм яшьләр хәрәкәте белән берлектә уздырыла. Смена 12 нче августта тәмамланачак.