Ниһаять, барыбыз да зарыгып көтеп алган көн дә килеп җитте! Бүген — 7-нче июль — IV Халыкара яшьләр уку-укыту "Сәләт" форумы Изге Биләр җирендә кабаттан "Сәләт"леләрне җыйды. Һава торышы салкынча булуга карамастан, биредә, һәрвакыттагыча, бик кызу: күмәк биюләр, якын дуслар, яраткан абый-апалар, танышулар... Кыскасы, бер сүз белән әйткәндә, Биләр җирендә, чын мәгънәсендә, күңелле тормыш кайный!

Быел беренчеләрдән булып бирегә "Изге чишмә" волонтерлар аланы аяк басты. Аның директоры Эмиль абый Шәйдуллин әйтүенчә, салкын яңгырлар да чын дуслыкка комачаулый алмый. "Без килгән көнне 3 сәгатьтән артык бик көчле яңгыр яуды. Барыбыз бергә кунак чатырында төнне үткәрергә мәҗбүр булдык. Бер төн эчендә дуслашып, дус-тату гаиләгә әйләнеп беттек. Бүген инде аланыбыз тулы составта: барлыгы 70 волонтер җыелдык. Форум барышында һәммәгезгә дә ярдәм итәргә әзербез!" - дип белдерде Эмиль абый.

 Шулай ук Форум башланырга бер көн алдан "Сәләт-Кандракүл" аланы да килеп җитте. "Сәләт-Кандракүл" - Татарстаннан читтә, Башкортостан Республикасында, Кандракүл буенда урнашкан. Шуңа хәлләрегез ничек дип сорауга "Ә без Кандракүлдә су коендык!" дип мактандылар.

 Ә бүген иртән иң беренчеләрдән булып Биләр җиренә "Сәләт-Саба" аланы аяк басты. Быел алар тагын да артканнар: алан барлыгы 70 баланы үзенә җыйган. Аларның хәлләрен белешергә барганда, бер төркем Саба кызларына юлыктык. "Безнең бар да яхшы, биредә бик күңелле, барлык беренче урыннарны яуларга килдек!" - дип белдерде алар. Уңышлар телибез сезгә!

 Барлык аланнар да җыелып беткәч сәламләү башланып китте. Бер-береңне сәламләү "Сәләт"-Биләр фестиваленнән үк килә. Сагыну хисләре, дуслык кадере - барысы да монда! Биредә һәр алан үзен үзенчәлеклерәк итеп күрсәтергә тырышты.

 Кичке чара вакытында исә, иң беренче эш итеп, Форумның быелгы оештыру комитеты җитәкчеләре белән таныштырып үтелде. Менә алар:
 - Форумның директоры - Җәүдәт абый Сөләйманов
- Форумның башкарма директоры - Тимур абый Сөләйманов
- Программа директоры - Гүзәл апа Усманова
- Уку-укыту программасы җитәкчесе - Анна апа Фельман
 - Арт-директор - Ислам абый Вәлиев
- Спорт программасы җитәкчесе - Нияз абый Мортазин
- Медиа җитәкчесе - Гөлшат апа Гыймадиева
- Техник директор - Роман абый Насыйбуллин
- Тәэмин итү юнәлеше җитәкчесе - Динар абый Барыев
- IT-ярдәм күрсәтү җитәкчесе - Ринат абый Сафин
- Торак өчен җаваплы - Руслан абый Шәмсетдинов
- Азык-төлек белән тәэмин итү өчен җаваплы - Алия апа Гарипова
- "Бәләкәч" махсус проекты җитәкчесе - Алсу апа Салаватова
- "Әдәби тәнәфес" махсус проекты җитәкчесе - Лилия апа Сираҗетдинова.

 “Сәләт”ебезгә нигез салучы Җәүдәт абый Сөләйманов та сәлкешләрне сәламләде: “Биредә кабаттан сезне күрүемә чиксез шатмын! Хуш килдегез! Дуслашыгыз, белем туплагыз, ял итегез!”.

 Кичке чара әйдаманнар концерты белән дәвам итте. Абый-апалар безгә һәр эштә, һәр өлкәдә үрнәк. Концерт та бик күңелле һәм кызыклы үтте.

 Иртәгә исә Форумыбызга мөхтәрәм кунагыбыз Татарстан Республикасының Президенты Рөстәм Нургали улы Миңнехановның килүе көтелә.