Сәләт Клубының яңа президенты ← кире кайтырга

25-нче сентябрь көнне Сәләт йортында Сәләт клубына багышлау узды. Әлеге күңелле кичәдә 150-гә якын Сәләт дөньясында кайнарга, үсәргә теләүче сәләтле, актив һәм максатчан балалар һәм яшьләр катнашты.

«Кызу җәй инде узып китте. Тик Сәләт йортында яңа уку елы белән беррәттән кызу тормыш дәвам итә. Әлеге тормышның һәм энергиянең төп чыганагы ул – сез. Ә сезнең саныгыз гел үсә, күбәя. Сәләт дөньясы да киңәя. Бу бик әйбәт. Сезнең уңышларны күзәтеп барырга, чиксез идеяләрегездән артта калмаска тырышам. Мин сезгә ышанам, чиксез горурланам!», - дип сәламләде Сәләт проектлары җитәкчесе Әдип Әлмир.

Сәләт Фондының башкарма директоры Тимур Сөләйманов сәлкешләргә көчле система тудырганнары өчен рәхмәтен җиткерде: «Әле кичә генә без гамәли семинардан кайттык. Бүген тулы ышаныч белән мине бөтен җирдә сезнең тарафтан тудырылган Сәләт энергетикасы озатып бара дип әйтә алам. Сезнең арада яңа йөзләрне күрәм. Безнең уртак Сәләт йортыбызда сезне тагын да көтеп калабыз: танышыгыз, дуслашыгыз, укыгыз, тәҗрибә уртаклашыгыз. Безнең сафларда инде күптәннән булганнарга ихтирамымны белдерәм: без – команда! Бары бергә булганда гына тагын да зуррак үрләр яулый алырбыз!»

Чараның тантаналы өлеше Сәләт Клубы президенты ролендә Айгөл Габдрахманованың эшчәнлегенә йомгак ясау белән дәвам итте.

«Барыгызга да зур рәхмәтемне белдерәсем килә. Командама – һәрвакыт минем белән булганнарына, сәлкешләргә – илһам чыганакларына, әйдаманнарга – ярдәмчеләремә, остазларыма – тәҗрибә өчен! Сәләт Клубының яңа президенты Игорь Смирновка яңа үрләр һәм уңышлар теләп калам! Минем күңелем – сезнең янда», - дип, яшьле күзләре белән белдерде Айгөл.

Сәләт Клубының элеккеге президентлары белән берлектә Игорьга яңа вазифа тапшырылды. Надир Курамшин, Алсу Ситдикова, Алсу Гатауллина да, үз чиратында, изге теләкләрен җиткереп уздылар. Яңа президентыбыз да сүзсез кала алмады: «Миңа калса, һәр сәлкеш кечкенә чагында Сәләт Клубы президенты дәрәҗәсе хакында хыяллана. Әлеге вазифа минем өчен яңалыкка бер адым булып тора. Якын дустымның мәгънәле бер фикере бар: «Аз сөйлә, күп эшлә». Үз эшчәнлегемне нәкъ менә шушы сүзләрдән башлап җибәрәсем килә: аз сөйләсәм сөйләрмен, тик күп эшләргә сүз бирәм! Ышанычыгыз өчен рәхмәт!» - ди Игорь.

Хәерле сәгатьтә! Бары уңышлар юлдаш булсын!