Тимур Сөләйманов: «Алдынгылар хәрәкәте»ндәге балаларга үзләрен күрсәтергә мөмкинлек биргән өчен «Сәләт»кә рәхмәт ← кире кайтырга

Биләрдәге «Сәләт» форумының йомгаклау сменасы «Алдынгылар хәрәкәте» белән берлектә уздырыла.

Кичә Биләрдә XII Халыкара «Сәләт» яшьләр уку-укыту форумының йомгаклау сменасы – Алдынгылар Биләр Форум старт алды. Быел ул беренче тапкыр «Алдынгылар хәрәкәте» Россия балалар һәм яшьләр хәрәкәте белән берлектә уздырыла.

Смена ачылышында «Сәләт» Яшьләр үзәге директоры Айгөл Габдрахманова чыгыш ясады:

«Без сезне көттек һәм сезнең өчен программа әзерләдек. Смена дәвамында биредәге актив катнашучыларның ким дигәндә йөзе белән дуслашырсыз дип ышанам. Сезгә вакытыгызны мавыктыргыч итеп уздыру, яңа белем алу, танышулар, киләсе уку елына энергия туплавыгызны теләп калам», – диде ул үз чыгышында.

Смена катнашучыларын Татарстан Республикасы Рәисе ярдәмчесе, «Алдынгылар хәрәкәте» балалар һәм яшьләр гомумроссия иҗтимагый-дәүләт хәрәкәтенең төбәк бүлеге Советы җитәкчесе Тимур Сөләйманов сәламләде.

«Биләр – көч җыю һәм очрашу урыны. Биредә без бер-беребезне тагын да көчәйтергә һәм үзара ярдәм итешергә тиешбез. Моны бары тик бер-береңне ишетә, хөрмәт итә, кадереңне белә торган җирдә генә эшләргә мөмкин. «Сәләт» тарафыннан яңа буынга шундый мөнәсәбәт, кайгыртучанлык, игътибар булганга, безнең, «Алдынгылар хәрәкәте»нең, яңа хәрәкәт буларак, зур миссиясе бар: яңа балаларга үзләрен күрсәтү мөмкинлеге бирү. Моның өчен «Сәләт»кә бик зур рәхмәт», – дип билгеләде үз чыгышында Тимур Сөләйманов. – Мин безне Байконур (дөньяда беренче һәм мәйданы буенча иң зур, хәзерге вакытта гамәлдә булган космодром – авт.) белән чагыштырыр идем. Бүген «Алдынгылар хәрәкәте» алдында космик бурыч тора: Алдынгылар җыелмасын булдыруга старт бирү. Татарстанда бу эшне җентекләп башкарабыз. Безгә барыбызга да һәр әгъзасы мөһим булган, бер зур гаиләгә әверелүебезне телим. Шул ук вакытта хәрәкәтебезнең гомуми принциплары, кыйммәтләре турында да онытмаска тиешбез. Әйтергә кирәк, алар «Сәләт» принциплары белән 100 процент туры килә. Әлеге урын – көч туплау урыны, нәкъ менә биредә зур хәрәкәтебез үсешенең яңа тармагы үз башлангычын ала.

Тантаналы ачылыштан соң Open-air концертында Илгиз Шәйхразиев һәм Malsi Music чыгыш ясады. «Сәләт» хитлары ярдәмендә алар смена катнашучыларын актив ял дулкынына көйләде.

Алдынгылар Биләр Форумда Татарстан муниципаль районнарыннан 12-17 яшьлек 900дән артык бала катнаша. Алар «Алдынгылар хәрәкәте»нең һәр бүлегеннән сайлап алынган.

Алтынчы смена укучылар үзидарәсен һәм команда күнекмәләрен үстерүгә багышлана. Форум эшчәнлеге «Алдынгылар хәрәкәте»нең 12 юнәлеше – белем бирү, фән, хезмәт һәм һөнәр, мәдәният, иреклелек, ватанпәрвәрлек, спорт, сәламәт яшәү рәвеше, медиа һәм коммуникацияләр, дипломатия, экология һәм туризм буенча алып барылачак.

Программа дәвамында укучыларны иҗтимагый оешмалар вәкилләреннән, төрле өлкә профессионалларыннан белем бирү мастер-класслары көтә.

Әлеге сменада «Нәрсә? Кайда? Кайчан?» элитар клубы әгъзасы, «Бәллүр ябалак» иясе Никита Старун да катнаша. Ул форум катнашучылары белән очрашачак һәм интеллектуаль турнир уздырачак.

9 һәм 10 августта сменада «Җанлы Сәләт» (SeletLive) студиясеннән турыдан-туры эфирлар үткәреләчәк. Аларны һәркем «Сәләт»нең ВКонтакте һәм YouTube рәсми аккаунтларында карый ала. Трансляцияләр 18.30да башланачак.

«Алдынгылар хәрәкәте» балалар һәм яшьләрнең Россия хәрәкәте ил Президенты Владимир Путин карары белән 2022 елның җәендә булдырылды. Татарстанда «Алдынгылар хәрәкәте» актив эшчәнлеген 2023 елның гыйнварында башлап җибәрде. Нәкъ менә шул вакытта төбәк хәрәкәтенең җитәкчесе итеп Тимур Сөләйманов билгеләнде.

Әлеге хәрәкәтнең төп юнәлешләре балалар һәм яшьләрнең кыйммәтләрен формалаштыру, уртак иҗади эшчәнлек аркылы балалар һәм яшьләрнең үзләрен күрсәтергә ярдәм итү, яшьләр хәрәкәтләре эшчәнлегенә яңа аудитория җәлеп итү.

Исегезгә төшерәбез, Халыкара «Сәләт» яшьләр уку-укыту форумы Татарстан Республикасы Хөкүмәте, ТР Яшьләр эшләре министрлыгы һәм ТР Мәгариф һәм фән министрлыгы ярдәме белән уздырыла.