«Sanak-lab» лабораториясеннән яңа ел күчтәнәче ← кире кайтырга
3-8-нче гыйнвар аралыгында «Фәнсар» уку-укыту үзәгендә беренче тапкыр «Sanak-lab» лабораториясенең күчмә мәктәбе узачак.
Яңа белем туплау, яңа ел маҗаралары, виртуаль чынбарлык, гитарага кушылып җырлау, кызыклы IT-проектларны тормышка ашыру, остаханәләр, яраткан әйдаманнар белән кабат очрашу – болар барысы да бу сменада булачак. Лабораториянең җитәкчесе Ләйсән Сабитовадан смена хакында тулырак белештек.
- Ләйсән, программа кайсы сыйныф укучылары өчен? Кем катнаша ала? Лабораториядә укучылар гына әлеге сессиягә бара аламы?
- Юк, 6-11-нче сыйныфта укучылар катнаша ала. Укыту программасы 2 өлештән торачак: лабораториядә бер ел дәвамында белем алучылар һәм яңа укучылар. Һәр укучы да үзе өчен кызыклы булган юнәлешне сайлап алып, шул өлкәдә белем туплый алачак.
- Уку-укыту программасы турында бераз сөйләп кит әле.
- Укыту программасы мәгълүмати техноологияләргә барып тоташа. Программалаштыру, сайтлар ясау, системалы администрацияләү, видеомонтаж, информатика буенча БДИ әзерлек.
- Лабораториядә бит БДИ әзерлек юк дип беләбез. Ни өчен монда кертергә булдыгыз.
- БДИ – бүгенге көндә бик кирәкле әйбер, үзегез дә беләсез. Бу сессиядә без балаларга бу өлкәдә күбрәк белем бирергә тырышырбыз, югары уку йортларына керергә ярдәм итәрбез.
- Шәп! Укытучылар турында да бер-ике сүз әйтеп китсәң.
- Лабораториядә ел дәвамында укыткан кешеләр белем бирәчәк. Шулай ук Татарстанның югары уку йортлары студентлары, аспирантлары да безнең белән булачак.
- Укы-укыту программасыннан тыш күңел ачу чаралары да күздә тотыламы?
- Укытучылар белән уку-укыту программасын әзерләсәк, әйдаманнарыбыз кызыклы чаралар уздыру өстендә эшлиләр. Яңа ел каникулларына туры килгәч Яңа ел Бал маскарады, саф хавада квестлар уздыру, чаңгы, чанада шуулар да булачак.
- Нәтиҗә ясап, бу смена балаларга нәрсә бирәчәк?
- Яңа белем, яңа хис-кичерешләр, онытылмаслык кышкы каникуллар, шулай ук бу мәктәптә белем алдым дигән сертификат. Дәресләр IT юнәлешендә булса, остаханәләр шәхес үсешенә күбрәк багышланачак. Кыскасы, шәп булачак. Безнең агымга кушылыгыз. Гаризаны монда тутырырга мөмкин.