Бүген Яшьләр эшләре буенча федераль агентлык (Росмолодежь) җитәкчесе урынбасары Григорий Гуров Мисыр Гарәп Республикасының Россия Федерациясендәге гадәттән тыш һәм вәкаләтле вәкиле Ихаб Наср белән эшлекле очрашу уздырды.
⠀
Очрашуда шулай ук «Росмолодежь» федераль агентлыгының халыкара эшчәнлек бүлеге җитәкчесе Татьяна Селиверстова һәм Татарстан делегациясе – халыкара яшьләр хезмәттәшлегенең «Россия – Ислам хезмәттәшлеге оешмасы» юнәлеше буенча ачылган Проект офисы җитәкчесе Таһир Насибуллин, ТР Яшьләр эшләре министрлыгының мәдәниятара багланышлар секторы мөдире Алиса Абрарова катнашты.
⠀
Яшьләр сәясәтенең әһәмиятле булуы әйтеп кителде, Россия-Мисыр хезмәттәшлеген үстерү буенча чаралар планлаштырылды. Алар арасында Россия-Мисыр яшьләр форумы һәм «Евразия Global» халыкара яшьләр форумы да бар.
⠀
Ә Таһир Насибуллин Проект офисының эшчәнлеге һәм киләчәккә планнары турында сөйләде. Эшчәнлекнең төп чаралары – ИХО илләре яшь дипломатлары форумы, ИХО илләре студентлары һәм аспирантларының халыкара фәнни конференциясе, ИХО илләре яшь эшмәкәрләре форумы булачак.