Шәхес

Илүзә Могыйнова

«Сәләт-Кандракүл» аланы әйдаманы

– Син Сәләт берләшмәсенә ничек килеп кердең?

– Сәләткә беренче тапкыр 2013-нче елда эләктем. Олимпадада призер булган өчен районнан делегация белән җибәргәннәр иде.

– Сәләттә иң яраткан өч сменаң.

– «Сәләт-Азнакай» - 2016, «Сәләт-Кандракүл» - 2018, SELET FORUMының 4-нче сменасы.

– Ул вакыттагы Сәләт белән бүгенге Сәләтне чагыштыр әле.

– Ул вакытта Сәләт үзенең мохите белән, ә хәзер мөмкинлекләре белән кызыксындыра!

– Сәлкеш – ул...

– Кояш булгандай һәр көнеңне яктыртып тора торган бала.

– Әйдаман – ул...

–Үзенең бар булган белемен һәм мотивациясен балаларга һәм бүтән кешеләргә дөрес итеп җиткерүче.

– Беренче әйдаманнарыңны хәтерлисеңме?

– Әлбәттә, хәтерлим. Ләкин иң яратканнары - өченче әйдаманнарым - Эльвина апа һәм Ленар абый.

– Син Сәләттә нинди эш башкарасың?

–Бу елны Сәләттә әйдаман буларак эшләдем.

– Күбесе белгәнчә, бу җәйне Биләрдә Сәләтнең 6 форумы үткәрелде. Син эшләгән форум турында сөйләсәң иде.

– Мин 3-нче һәм 4-нче форумнарда эшләдем. Аларның икесе дә искиткеч узды! Тик 4-нчесе минем өчен ниндидер яңа ачыш булды һәм күбрәк ошады. Монда иң мөһиме - балалар. Ә алар һәрбер форумда да шәп булдылар!

– Сәләткә нинди проектлар җитми дип уйлыйсың?

– Сәләттә проектлар, минемчә, җитәрлек... Яңалары турында уйлыйсы да килми хәтта.

– Сәләттән кала нинди кызыксынуларың бар?

– Мин биим һәм фото-видео белән кызыксынам. Барлык буш вакытымны нәкъ менә шуларга багышларга тырышам.

– Татарча иң яраткан сүзләрең яки фразаларың.

– Күп суз – чүп сүз!

– Сәлкешләргә теләгең.

– Бар булган мөмкинлекләрегезне вакытында күреп алыгыз, аларны кулланырга ашыгыгыз!

тулысынча укырга

Илһам Ильясов

«Сәләт-Рухият» сменасы әйдаманы

– Син Сәләт берләшмәсенә ничек килеп кердең?

– Сәләт дөньясы белән 2014-нче елда мине якын дустым таныштырды. Ул вакытта аның белән бергә КВНда уйный идек. Бер тапкыр «Сәләт-Шәхес» сменасы тәмамлангач, дустым аларның командасына ярдәм итәргә чакырды. Шул вакыттан башлап минем әлеге зур дөнья белән танышуым башланды. Озакламый Альбина апа Кадирова һәм Алия апа Мирмиева белән дә танышты. Шуннан соң, мине Сәләтнең 20 еллыгында микрофон стойкаларын сәхнәгә чыгарырга чакырдылар. Ул вакытта минем өчен бу бик шәп тәкъдим иде. Күпмедер вакыт үткәч, мин тулысынча әлеге оешмага бирелдем һәм үземнең беренче сменама «Сәләт -Рухият»кә юл тоттым.

– Сәләттә иң яраткан өч сменаң.

– Барысын аңлар өчен, сезгә бары тик 3 сөрәнне әйтәм: «Лиловая пантовая Рухият», «Минем йорт Сәләт Телдә», «Кс-кс Сәләт Шәхес». Кыскасы, әлеге 3 смена миңа үз өлешен бүләк итте, ә мин үз чиратымда аның эчке дөньясына үз өлешемне калдырдым.

– Ул вакыттагы Сәләт белән бүгенге Сәләтне чагыштыр әле.

– Чагыштырырга бик авыр. Чөнки оешмага мин әле күптән түгел генә кушылдым. Әмма, шунысын әйтә алам: Сәләт бер урында тормый, һаман зур адымнар белән алга атлый.

– Сәлкеш – ул...

– Сәләт ансыз сулый алмый торган һава.

– Әйдаман – ул...

– Сәлкеш өчен кислород. (Елмая)

– Беренче әйдаманнарыңны хәтерлисеңме?

– Әйе, хәтерлим. Ләйсән апа Шәйхетдинова һәм Айрат абый Шакиров. 2015-нче ел, «Сәләт-Рухият», мин беренче тапкыр сәлкеш, Ләйсән апа беренче тапкыр әйдаман, ә Айрат абый инде бик тәҗрибәле. Әйе, бераз авыр, ләкин шул ук вакытта бик шәп иде! Ләкин, алар йөрәккә кереп калдылар.

– Син Сәләттә нинди эш башкарасың?

– Хәзерге вакытта ял итәм. Тиздән «Әйдаманнар ярышы»на әзерләнә башлармын дип уйлыйм.

– Күбесе белгәнчә, бу җәйне Биләрдә Сәләтнең 6 форумы үткәрелде. Син эшләгән форум турында сөйләсәң иде.

– Әлеге җәйдә 4 сменада булырга насыйп булды. Беренче ике сменада «Сәләт-Тел» һәм «Сәләт-Рухият» аланнарында әйдаман булып эшләдем. «Сәләт-Тел» белән беренче форумга килгәч, үзгәрешләргә, яңа масштабларга исем китте. «Сәләт-Рухият»кә әлеге үзгәрешләрне истә тотып, сокланып бардым. «Сәләт-Рухият» белән форум җирлегендә 10 көн яшәдек һәм иң кызыгы, бу көннәр эчендә әлеге җир минем өчен тагын да якынрак булды. Ә менә инде 5-нче форумга мин өлкән әйдаман вазыйфасын башкарырга килдем. Үз командам, беренче тапкыр җитәкче ролендә. Истә калырлык хисләр! Соңгы сменага исә методист буларак бардым. Шулай ук яңа тәҗрибә дип әйтә алам. 2018-нче ел җәе минем өчен яңа ачышлар һәм мөмкинлеләр вакыты булды.

– Сәләткә нинди проектлар җитми дип уйлыйсың?

– «Сәләт-Рухият» мәктәбе. «Сәләт-Олимп» һәм «Фәнсар»ның көзге, кышкы, язгы сессияләре бар. Безгә дә, иҗади балаларга, әлеге форматтагы күчмә мәктәпләр кирәк дип саныйм. Театр, бию, рәсем ясау, фото, КВН белән шөгыльләнүчеләр өчен бу бик яхшы мөмкинлек булыр иде.

– Сәләттән кала нинди кызыксынуларың бар?

– Элек КВНда уйный идем. Хәзерге вакытта SMM белән шөгыльләнәм. Буш вакытта укырга яратам.

– Татарча иң яраткан сүзләрең яки фразаларың.

– Могҗиза һәм илһам.

– Сәлкешләргә теләгең.

– Вакытыгызны бушка үткәрмәгез, төрле өлкәләрдә үзегезне сынагыз, тормышның бар ямен татып калыгыз!

тулысынча укырга

Рәмис Садриев

«Сәләт-Рухият» сменасы әйдаманы

– Син Сәләт берләшмәсенә ничек килеп кердең?

– Сәләт оешмасына мине апам Алинә Садриева алып килде. Әле ерак 2010-нчы елда ул миңа Сәләткә бару мөмкинлеге турында сөйләгән иде. Ләкин, ул вакытта мин баш тарттым. Ә менә инде 2012-нче елда ул мине «Сәләт-Шәхес»кә көчләп алып барды дияргә була. (Көлә) Шул вакыттан башлап минем әлеге сменаны бер дә калдырганым булмады.

– Сәләттә иң яраткан өч сменаң.

– «Фәнсар мәктәбе», «Сәләт-Рухият», «Сәләт-Шәхес (КВН)».

– Ул вакыттагы Сәләт белән бүгенге Сәләтне чагыштыр әле.

– Оешмада мин бары тик 2012-нче елдан. Мин Биләр фестивалендә дә булмадым, бары тик форумнарда гына. Шуңа күрә, минем өчен Сәләт – һәрвакытта да тиз темп белән үсеп баручы мохит. Биредә мин яңа дуслар һәм үсер өчен төрле мөмкинлекләр таба алам.

– Сәлкеш – ул...

– Сәлкеш – бу безнең чагылыш.

– Әйдаман – ул...

–Әйдаман – барлык балалар өчен үрнәк!

– Беренче әйдаманнарыңны хәтерлисеңме?

– Әйе, әлбәттә! Минем беренче әйдаманнарым Таһир абый Насибуллин һәм Аделя апа Гарипова. Бүгенге көндә дә алар белән бик яхшы аралашам.

– Син Сәләттә нинди эш башкарасың?

– Мин интеллектуаль клубның әгъзасы. Шулай ук күп кенә Сәләт проектларының оештыручысы.

– Күбесе белгәнчә, бу җәйне Биләрдә Сәләтнең 6 форумы үткәрелде. Син эшләгән форум турында сөйләсәң иде.

– Уууууу, мин 2-нче форумнан кала бөтенесендә дә булдым. Барлык форумнарда да мин оештыручы һәм интеллектуаль уеннарны алып баручы идем. Төп форумда исә «Сәләт-Рухият» аланында әйдаман булып эшләдем. Ә инде 5-нче форумда өлкән әйдаман вазыйфасын башкардым.

– Сәләткә нинди проектлар җитми дип уйлыйсың?

– Соңгы елларда спорт һәм юмористик проектлар югалды. Аларның кабаттан эшләүләрен бик телим. (Елмая)

– Сәләттән кала нинди кызыксынуларың бар?

– Мин укыйм һәм эшлим. Эшлим һәм укыйм. Ләкин, барлык буш вакытымны Сәләткә багышлыйм.

– Татарча иң яраткан сүзләрең яки фразаларың.

– Аш булсын – мина булсын.

– Сәлкешләргә теләгең.

– Иң мөһиме, барлык нәрсәне йөрәгегезгә бик якын кабыл итмәгез! Бала булганыгызна шатланып яшәгез!

тулысынча укырга

Резеда Абдуллина

«Сәләт-Азнакай» әйдаманы

– Син Сәләт берләшмәсенә ничек килеп кердең?

– Сәләткә мин 2012-нче елда Чаллыда, махсус кызлар өчен булдырылган «Сәләт-Вакыйга» сменасы аша эләктем. Әлеге смена журналистика юнәлешенә багышланган иде.

– Сәләттә иң яраткан өч сменаң.

– Минемчә, барлык аланнар да бик көчле һәм иң мөһиме – тату. Шуңа күрә, алар арасыннан бары тик 3 генә сайлау авыррак. Ләкин, хәзерге вакытта күңелемә иң якын булганнары - «Сәләт-Азнакай», «Сәләт-Санак», «Сәләт-Шәхес». Чөнки, бу көнгә кадәр мин бары тик әлеге сменаларда гына эшләдем. (Елмая)

– Ул вакыттагы Сәләт белән бүгенге Сәләтне чагыштыр әле.

– Сәләт белән минем арада зур гына пауза булды. Шул исәптән, дөрес чагыштыра алмам дип уйлыйм. Шунысын әйтә алам, бирегә кайтканыма мин бик шат!

– Сәлкеш – ул...

– Сэлкеш – ул Гиннесс рекордлар китабы кебек. Ул үзендә шактый гына күп төрле ирешүләр туплаган.

– Әйдаман – ул...

– Әйдаман – фея. Һәрвакытта да янда, ярдәм итәргә әзер булып тора.

– Беренче әйдаманнарыңны хәтерлисеңме?

– Дөресен генә әйткәндә, исемнәрен хәтерләмим. Исемнәргә хәтерем бик яхшы түгел шул. Ләкин, миндә булган барлык әйдаманнар – иң якыннары һәм яхшылары.

– Син Сәләттә нинди эш башкарасың?

– Бүгенге көндә әйдаман вазыйфасын гына башкарам.

– Күбесе белгәнчә, бу җәйне Биләрдә Сәләтнең 6 форумы үткәрелде. Син эшләгән форум турында сөйләсәң иде.

– Әлеге җәйне форумның 3-4-нче сменаларында эшләргә насыйп булды. Бу бик «мощно» булды! Биредә алган хисләрне башка бер сүз белән дә тасвирлап булмый. Шуның кадәр яңа кеше белән танышу, хис кичерешләр алу һәм мохит өчен аерым рәхмәт әйтәсе килә. Презентациядән соң балаларның күзләрен күрсәгез... Ул мизгелләрне бүтән нәрсә белән чагыштырып булмый...

– Сәләткә нинди проектлар җитми дип уйлыйсың?

– Авыр сорау. Оешмада төрле юнәлешләрне үстерү өчен күп кенә проектлар булдырылган. Хәзерге вакытта аерым ниндидер проект җитми дип уйламыйм.

– Сәләттән кала нинди кызыксынуларың бар?

– Сәләттән тыш КВН белән шөгыльләнәм, бәләкәй балалар белән эшлим.

– Татарча иң яраткан сүзләрең яки фразаларың.

– Рәхәт-бәхет,әйдә ашарга,кыргый гафу.

– Сәлкешләргә теләгең.

– Кадерле һәм яраткан сәлкешләр! Һәрвакытта да үзегез булып калыгыз! Шуны онытмагыз, сезнең һәрберегез индивидуаль.

тулысынча укырга

Таһир Кәримуллин

«Сәләт-Самара» сменасы өлкән әйдаманы

– Син Сәләт берләшмәсенә ничек килеп кердең?

– 8-нче сыйныфта укыганда мин яшь журналистларның «Алтын каләм» фестиваленә эләктем. Андагы татар төркеме гел «Сәләт» турында сөйләшә иде. Берничә бала «Сәләт-Раушан» сменасын зарыгып көтүләре турында әйтте. Мин дә кызыктым. Һәм 9-нчы сыйныфта һичшиксез Сәләткә барырга дигән максат куйдым. Менә шулай килеп эләктем мин Сәләт дөньясына. Һәм бик озакка эләктем (елмая).

– Сәләттә иң яраткан өч сменаң.

– «Сәләт-Самара», «Сәләт-Раушан», Клуб семинарлары (алары алан түгел, шулай да «Сәләт»ле тормышымда аерым урын алып торалар).

– Ул вакыттагы Сәләт белән бүгенге Сәләтне чагыштыр әле.

– Минемчә, мин сәлкеш булган һәм хәзер үзем өлкән әйдаман булган заманнарны чагыштыру бик үк дөрес түгел. Шунысын гына төгәл әйтә алам: Сәләт искиткеч зур темпта үсә, һәрвакыт заман белән бергә атлый, гел хәрәкәттә.

– Сәлкеш – ул...

– Минем өчен сәлкеш Сәләт аланында булып киткән бала гына түгел. Сәлкеш – көн саен үзен үстерү юнәлешендә эшли, һәрчак камиллеккә, үсешкә омтыла торган бала ул.

– Әйдаман – ул...

– Ул тормыш рәвеше.

 

– Беренче әйдаманнарыңны хәтерлисеңме?

– Әлбәттә, хәтерлим: Рафаэль абый Шамилов белән Гөлнара апа Арсланова. 

– Сәләткә нинди проектлар җитми дип уйлыйсың?

– Әйткәнемчә, Сәләт һәрвакыт заман белән бер аяктан атлый. Актуаль проектлар булдыра, шул ук вакытта берләшмәнең традицияләрен һәм принципларын да саклый.

– Син Сәләттә нинди эш башкарасың?

– Гомумән алганда, эшчәнлегем җәйге сменалар белән бәйле. 2015-нче елдан башлап, «Сәләт-Әлмәт» и «Сәләт-Менеджер» клубларының кураторлары да булып торам. «Сәләт Биләр Форум», «Бика Фест», «Хорлар Фестивале» кебек проектларны оештыруда катнашканым бар.

– Сәләттән кала нинди кызыксынуларың бар?

– Мин Сәләт тормышында актив катнашырга тырышам, шуңа күрә энергиямне юк-барга сарыф итмим. Спорт, музыка белән шөгыльләнәм, китаплар укырга яратам.

– Татарча иң яраткан сүзләрең яки фразаларың.

– Син яшәмә җирдә файдасыз бер 
Түмгәк булып тигез урында. 
Янып калсын гомрең маяк булып,
Үзеңнән соң килгән буынга.
Муса Җәлилнең «Бер үгет» шигыреннән алынган бу сүзләр – минем тормыш девизым.

– Сәлкешләргә теләгең.

– Ачык булыгыз, яңа дуслар табыгыз, бергәләп үсегез. Киләчәктә сез якын дусларга әйләнәчәксез.

тулысынча укырга

Роберт Шәрәфетдинов

«Сәләт-Бөгелмә» сменасы өлкән әйдаманы

– Син Сәләт берләшмәсенә ничек килеп кердең? 
– Якын дустым, сыйныфташым чакырды. Сәләтле кешеләрнең кабатланмас мохит тудыруы турында бик ялкынланып сөйләде. Ул мохитне үз күзләрем белән күрү, тою өчен миңа, әлбәттә инде, үземә Сәләткә барып карарга кирәк иде. Һәм мин дустыма ияреп 2013-нче елда Язгы сессиягә бардым. Ул вакытта сессияләр «Байтик» базасында үтә иде әле. 

– Сәләттә иң яраткан өч сменаң. 
– «Сәләт-Бөгелмә», «Сәләт-Гайрәт», «Сәләт-Шәхес». 

– Ул вакыттагы Сәләт белән бүгенге Сәләтне чагыштыр әле. 
– Һәр заман Сәләте үзенчә шәп. Сәләт һәрчак үсештә, һәм бу иң мөһиме! 

– Сәлкеш – ул... 
– Кыйммәтле таш. 

– Әйдаман – ул... 
– Шул кыйммәтле таш белән эшләүче ювелир. 

– Беренче әйдаманнарыңны хәтерлисеңме? 
– Әйе, бик әйбәт хәтерлим. Айсылу апа белән Таһир абый. Мин оялчан бала түгел идем, тик шулай да беренче тапкыр килгәч, Сәләт дөньясына кереп китү авыррак булды. Әйдаманнарым һәрчак минем белән сөйләште, миңа терәк булдылар, нәтиҗәдә, сессиягә килүемнең өченче көнендә мин инде Сәләт кешесенә әйләнгән идем. Моның өчен беренче әйдаманнарыма бик рәхмәтлемен.

– Син Сәләттә нинди эш башкарасың? 
– Иң текә «Сәләт-Бөгелмә» командасы белән һәр атна саен җыелып, алтын балалар өчен онытылмаслык 18 көн әзерлибез. #нетничегокручечемнашабуга

– Сәләттән кала нинди кызыксынуларың бар? 
– Университетта 4-нче курста укыйм, футбол буенча җыелма командада уйныйм, эшлим, кыскасы, вак-төяк мәшәкатьләр өчен борчылып утырмыйм, тормыштан тәм табып яшим. 

– Татарча иң яраткан сүзләрең яки фразаларың. 
– Аш булсын! Чын күңелдән без бөгелмәдән. «Калган эшкә кар ява». 

– Сәлкешләргә теләгең. 
– Оялып тормагыз, яңа кешеләр белән танышыгыз, бер минутны да әрәм итмәгез, үзегезне төрле яңа рольләрдә сынап карагыз, ачылыгыз, үзегезне чолгап алган Сәләт мохитеннән тәм табыгыз.
тулысынча укырга

Ләйсән Шәйхетдинова

«Сәләт-Кандракүл» сменасы өлкән әйдаманы

– Син Сәләт берләшмәсенә ничек килеп кердең?

– 2012-нче елда беренче тапкыр «Сәләт-Болгар» сменасы узды. Шул елдан башлап, мин һәр елны Сәләт атмосферасына чумам.

– Сәләттә иң яраткан өч сменаң.

– Әлбәттә инде, күңелемә иң якын алан – «Сәләт–Болгар». «Сәләт–Имәнкәй»нең имән кебек нык дустанә мохитенә сокланам. Ә хәзер бу исемлеккә «Сәләт – Кандракүл» дә өстәлде.

– Ул вакыттагы Сәләт белән бүгенге Сәләтне чагыштыр әле.

– Бу сорауга озаклап уйлап җавап бирергә кирәк. Ә уйлар хатирәләрдән барлыкка килә. Сәләт минем өчен һәрвакыт җылылык чыганагы, гаилә булды. Хәзер мин моның шулай булуын тагын да яхшырак аңлыйм.

– Сәлкеш – ул...

– Мин һәрвакыт кабатлыйм: сәлкеш ул – чиксез илһам, яхшы кәеф чыганагы, әйдаманнар уйлаган искиткеч зур максатларның мәгънәсе, әйдаманның чагылышы.

– Әйдаман – ул...

– Иң якын, иң ихлас, иң көчле, иң акыллы һәм иң кирәкле кеше!

– Беренче әйдаманнарыңны хәтерлисеңме?

– Әлбәттә, хәтерлим! Алар белән һаман да горурланам. Аларның ихласлыгын күңелемдә саклыйм, кирәк вакытта ул ихласлык миңа бик булыша. Беренче әйдаманнарым минем тормышымда мөһим роль уйнады.

– Ничек уйлыйсың, безгә нинди проектлар җитми?

– Сәләттә проектлар бик күп һәм алар барысы да шәп. Мин форумнан тыш та төрле кызыклы мастер-классларга йөрер идем. Әйтик, кышын. Ул мастер-классларны танылган кешеләр уздырырга тиеш дигән сүз түгел, Сәләттә талантлы һәм акыллы кешеләр бик күп бит.

– Син Сәләттә нинди эш башкарасың?

– Элегрәк даими рәвештә «Бикафест», «Сәләткә нур булган йолдызлар» бәйгеләрендә катнаша идем. «Сәләт-Медиа мәктәбе»ндә дә белем алдым. Ә хәзер бар көчемне «Сәләт-Кандракүл» аланы эшчәнлегенә юнәлдерергә тырышам.

– Сәләттән кала нинди кызыксынуларың бар?

– Фотога төшерәм, скрапбукинг белән мавыгам. Университетта укыйм.

– Татарча иң яраткан сүзләрең яки фразаларың.

– Кулдашым; Яз апа; иртә.

– Сәлкешләргә теләгең.

– Бөтен җирдә булырга һәм Сәләттәге бөтен яхшы нәрсәне үзеңә сеңдерергә тырыш. Вакытыңны яраткан шөгылеңә багышла.

тулысынча укырга

Миләүшә Сираҗиева

«Сәләт-Яр Чаллы» сменасы өлкән әйдаманы

– Син Сәләт берләшмәсенә ничек килеп кердең?

– 2016-нчы елда «Әйдаманнар мәктәбе» башланырга бер көн кала миңа әлеге мәктәпкә килеп карарга тәкъдим иттеләр. Күпчелек дусларым Сәләт дөньясында кайный, сүз саен Сәләтне кыстырып сөйләшә иде, шуңа күрә бик теләп риза булдым. Алар сөйләшкәндә үк үземне шушы зур берләшмәнең бер кисәкчеге итеп хис итә идем инде. Мөмкинлек булуга, аны кулымнан ычкындырмадым.

– Сәләттә иң яраткан өч сменаң.

– «Сәләт-Яр Чаллы», «Сәләт-Эшмәкәр», «Сәләт-Имәнкәй» – нәкъ менә шушы аланнар 2017-нче елның җәен онытылмаслык итте.

– Ул вакыттагы Сәләт белән бүгенге Сәләтне чагыштыр әле.

– Мин Сәләткә әле күптән түгел генә килеп кердем. Тик үзем бу дөньяда кайнаган 3 елны гына карасак та, үзгәрешләр күзгә күренеп тора. Ел саен күбрәк проектлар, форумнар барлыкка килеп тора, аларда катнашып, үзеңнең сәләтләреңне ачарга мөмкин.

– Сәлкеш – ул...

– Бетми торган энергия һәм илһам чыганагы.

– Әйдаман – ул...

– Әйдаманны күңелендә һәр бала турында хатирәләр саклый торган фотографка тиңләр идем.

– Беренче әйдаманнарыңны хәтерлисеңме?

– Кызганыч, тик миңа сәлкеш булу насыйп булмады, тик мин бу бушлыкны хәзер – үзем әйдаман, өлкән әйдаман һәм директор булып эшләгәндә тутырырга тырышам.

– Ничек уйлыйсың, безгә нинди проектлар җитми?

– Сәләттә балаларны төрле яклап ачарга ярдәм итә торган төрледән-төрле проектлар бихисап. Мондый масштабтагы берләшмәгә үзенең белем бирү учреждениесен ачу турында уйланса да буладыр дип саныйм. Бу бездәге белем бирү системасына яңа сулыш өрер иде.

– Син Сәләттә нинди эш башкарасың?

– Быел мин «Сәләт-Яр Чаллы» аланында өлкән әйдаман, «Сәләт-Имәнкәй»дә директор һәм 5-нче форумда директорларның берсе булачакмын.

– Сәләттән кала нинди кызыксынуларың бар?

– Минем кызыксынуларым бик күп төрле. Актив рәвештә фән белән шөгыльләнәм, мәкаләләр язам, конференцияләрдә катнашам. Җырлыйм, биим, Студентлар Язында катнашам, кыскасы, актив студент тормышы алып барам.

– Татарча иң яраткан сүзләрең яки фразаларың.

– «Акылың адашса, йөрәгеңнән юл сора».

– Сәлкешләргә теләгең.

– Сәлкешләр, илһамланыгыз һәм илһамландырыгыз!

тулысынча укырга

Ләйсән Сафина

«Сәләт-Санак 2018» сменасы өлкән әйдаманы

– Син Сәләт берләшмәсенә ничек килеп кердең?

– 2014-нче елда безнең мәктәптә конференция узды. Шул конференциядә мин бер кыз белән таныштым, ул «Сәләт-Санак» аланында әйдаман иде. Мине дә Сәләткә чакырды. Шулай кереп киттем.

– Сәләттә иң яраткан өч сменаң.

– Минем өчен бу бик катлаулы сорау, чөнки Сәләтнең ике аланында гына булганым бар. Ләкин барлык сменалар да шәптер дип уйлыйм. Ә минем өчен иң мөһим һәм кадерле аланнар ул – «Сәләт-Санак», «Сәләт-Батыр» и «Sanak-lab».

– Ул вакыттагы Сәләт белән бүгенге Сәләтне чагыштыр әле.

– Сүз дә юк, Сәләт үсте һәм ныгыды. Яңа проектлар барлыкка килеп тора, сәләтле балалар елдан-ел күбрәк килә һәм алар безнең мохитне тагын да көчлерәк һәм яктырак итә.

– Сәлкеш – ул...

– Сәлкеш – ул күктә якты итеп яна, шул ук вакытта әйтеп бетергесез җылылык һәм илһам бирә торган йолдыз.

– Әйдаман – ул...

– Әйдаман – ул һәр балада сәләт очкынын күреп, шуны кабызып җибәрергә ярдәм итүче кеше.

– Беренче әйдаманнарыңны хәтерлисеңме?

– Беренче һәм бердәнбер әйдаманнарымны әлегәчә хәтерлим. Алар – Гөлназ апа Шәрәфетдинова белән Дамир абый Нәгыймуллин. Гөлназ апа бик яхшы күңелле иде, бөтен кешегә җылылык һәм наз өләште, ә Дамир абый – бик күңелле кеше һәм идеяләр чыганагы. Гөлназ Шәрәфетдинова белән һаман да аралашып торабыз.

– Ничек уйлыйсың, безгә нинди проектлар җитми?

– Хәзерге вакытта Сәләттә кызыклы проектлар бихисап, шуңа күрә нәрсә җитмәвен әйтү дә кыен. (Елмая)

– Син Сәләттә нинди эш башкарасың?

– Хәзерге вакытта мин «Сәләт-Санак» аланының өлкән әйдаманы, шулай ук «Sanak-lab» проектында да кайныйм.

– Сәләттән кала нинди кызыксынуларың бар?

– Мин театраль күренешләрдә катнашырга бик яратам, шуңа күрә театр студиясенә йөрим.

– Татарча иң яраткан сүзләрең яки фразаларың.

– Күз күрә берне, күңел — меңне.

– Сәлкешләргә теләгең.

– Хыялланудан һәм шул хыялга таба атлаудан курыкмагыз! Хыялларның тормышка аша торган гадәте бар!

тулысынча укырга

Алия Әхмәтова

«Сәләт-Раушан 2018» сменасы өлкән әйдаманы

– Син Сәләт берләшмәсенә ничек килеп кердең?

– 2013-нче елда апам мине «Сәләт-Болгар» аланына чакырды һәм мин анда бик теләп бардым. Берничә көн палаткада яшиячәгебезне белгәч, башта курыккан идем, тик моның үз романтикасы бар икән (елмая). Шушы кыска гына смена вакытында миңа гомеремдә беренче сары футболка бирделәр, күп кенә кызыклы кешеләр белән таныштым, Биләр форумында катнаштым һәм Сәләт берләшмәсе дөньясына гашыйк булдым!

– Сәләттә иң яраткан өч сменаң.

– Иң яхшы смена «Сәләт-Раушан» булды. Бу аланның бер өлеше булуыма ничек сөенүемне сүзләр белән генә аңлатып бетереп булмый. Шулай ук «Сәләт-Осталар Бистәсе» сменасын да аерып әйтәсем килә. Бу алан миңа өлкән әйдаман тәҗрибәсен бүләк итте. 80 бала, 6 әйдаман һәм 5 укытучы – барыбыз да бер гаиләгә әйләндек. Һәм, әлбәттә инде, «Сәләт-Монреаль». Бу алан минем тормышымда яңа этап булды, ул миңа онытылмаслык сәяхәт һәм хыялдагы командада эшләү мөмкинлеге бирде!

– Ул вакыттагы Сәләт белән бүгенге Сәләтне чагыштыр әле.

– Вакыт узу белән барысы да үзгәрә, Сәләт тә искәрмә түгел. Тик бу үзгәрешләр яхшы якка – шунысы сөендерә. Һәр елны Сәләт сменалары, чаралары һәм форумнары үзенең масштаблары һәм оста оештырылган булуы белән гаҗәпләндерә. Сәләт – балалар һәм яшьләрне үстерү, аларның мөмкинлекләрен ачарга ярдәм итү өчен менә дигән мәйдан. Тик үзгәрми калган нәрсәләр дә бар. Бу – атмосфера. Ул элек ничек җылы булган булса, хәзер дә шулай!

– Сәлкеш – ул...

– Сәләтнең йөрәге!

– Әйдаман – ул...

– Сәләтнең җаны!

– Беренче әйдаманнарыңны хәтерлисеңме?

–Алар – Эльнар абый Байназаров һәм Айзилә апа Гыйззәтуллина. Мин аларга бик рәхмәтле! Алар һәр баланың күңеленә юл таба белде, төркемдә җылы һәм дустанә атмосфера булдырды, шәхсән мине Сәләт белән таныштырдылар, аланнар, проектлар, форумнар турында сөйләделәр, болар барысы да миндә шушы берләшмәнең бер кисәкчеге буласы килү теләген арттырды!

– Ничек уйлыйсың, безгә нинди проектлар җитми?

– Сәләтнең һәр проекты үзенчә кызыклы һәм файдалы, чөнки аларның һәрберсе балаларны һәм яшьләрне төрле яклап үстерүне күздә тота. Һөнәр сайлау белән бәйле проект тәкъдим итәр идем. Балаларны киләчәк заман һөнәрләре белән таныштыра, аларга һөнәр сайларга ярдәм итә торган бу проектны World Skills форматында да эшләргә мөмкин. Минемчә, бик шәп булачак!

– Син Сәләттә нинди эш башкарасың?

– Хәзерге вакытта мин Сәләт клубларының өлкән кураторы, шулай ук «Сәләт-Раушан 2018» аланының өлкән әйдаманы һәм «Сәләт-Аршан 2018» аланы әйдаманы.

– Сәләттән кала нинди кызыксынуларың бар?

– КФУның Идарә, икътисад һәм финанслар институтында 4-нче курста укыйм, университеттагы фәнни конференцияләрдә катнашам, мәкаләләр язам, мәктәп укучыларын җәмгыять белеме һәм инглиз теле фәннәреннән төп дәүләт имтиханын (ОГЭ) тапшыруга әзерлим.

– Татарча иң яраткан сүзләрең яки фразаларың.

– Хәрәкәттә – бәрәкәт.

– Сәлкешләргә теләгең.

– Һәрвакыт үз максатыгызга таба барыгыз, үз-үзегезгә ышаныгыз! Һәм барысы да яхшы булачак!

тулысынча укырга

Дамир Гарифуллин

«Сәләт-Биләр каласы 2018» сменасы өлкән әйдаманы

– Син Сәләт берләшмәсенә ничек килеп кердең?

– 7-нче сыйныфта укыганда сыйныф җитәкчем миңа сәләтле балалар лагере – «Сәләт» турында сөйләде һәм анда барып карарга тәкъдим итте.

– Сәләттә иң яраткан өч сменаң.

– «Сәләт-Раушан» – чөнки минем юлым шунда башланды. «Сәләт-Биләр каласы» – чөнки бу хәзер минем өем. «Фәнсар» – чөнки ул бөтен кешегә чиксез мәхәббәт, дустанә мөнәсәбәт булган бер гаилә.

– Ул вакыттагы Сәләт белән бүгенге Сәләтне чагыштыр әле.

– Мин беренче тапкыр сәлкеш булганнан соң күп нәрсәләр үзгәрде. Беренчедән, белем бирү программасының сыйфатын билгеләп үтәсем килә. Ул хәзер күпкә сыйфатлырак, дәресләрдә мәгълүматны күпкә кызыклырак итеп бирәләр. Икенчедән, Сәләт хәзер җәйге алан гына түгел, күпкә зуррак. Дөрес, элек тә кайбер проектлар ел дәвамында бара иде, тик алар хәзергегә караганда азрак һәм кечерәк масштаблы иде. Өченчедән, без хәзер Форум дип йөртә торган чара элек Фестиваль иде. Анда кешеләр дә әзрәк, белем бирү программасы да таррак иде. Аның каравы анда бик җылы атмосфера хөкем сөрде! Мин 2 Фестивальдә катнаша алуым белән бәхетле. Аларның ничек үтүен сүзләр белән генә аңлату кыен. Аңлау өчен, «Палатка, учак һәм гитара» җырын тыңлап карарга кирәк.

– Сәлкеш – ул...

– Сәлкеш – Сәләт принципларын хөрмәт итә һәм аларга тугры кала торган сәләтле бала.

– Әйдаман – ул...

– Әйдаман – балаларны яратучы һәм алар белән белемен, осталыгын, сәләтен бүлешергә әзер булган кеше.

– Беренче әйдаманнарыңны хәтерлисеңме?

– Алар Надир абый Курамшин белән Гөлнара апа иде (кызганыч, аның фамилиясен хәтерләмим).

– Ничек уйлыйсың, безгә нинди проектлар җитми?

– Дөресен генә әйткәндә, хәзер Сәләттә төрледән-төрле проектлар бихисап. Минемчә, берләшмәнең спорт лигасын булдырсаң начар булмас иде. Ялгышмасам, бер тапкыр Сәләтнең футбол буенча турниры узган иде, шахмат буенча турнир да ел саен уздырылып килә. Тик барыбер спорт җитеп бетми дип саныйм.

– Син Сәләттә нинди эш башкарасың?

– Мин «Сәләт-Биләр каласы 2018» аланының өлкән әйдаманы. Тагын «Сәләт-Эшмәкәр» аланына әйдаман булып та барачакмын. Ел дәвамында «Фәнсар» күчмә сессиясендә әйдаман булдым. Калган проектларда катнашырга, кызганыч, вакытым җитми.

– Сәләттән кала нинди кызыксынуларың бар?

– Мин программист булып эшлим. Python телендә скриптлар язам. Буш вакытымда дусларым белән очрашам, бергәләп өстәл уеннары уйныйбыз, яңалыклар белән уртаклашабыз. Мин әле Real Madrid командасы җанатары да, бу команданың бөтен матчларын карап барам. Илһам килгәндә, иҗат белән шөгыльләнәм: шигырь язып, рәсем ясаган булып карыйм. Тик болар барысы да гадәти эшчәнлегемне үзгәртеп аласы килүдән генә инде.

– Татарча иң яраткан сүзләрең яки фразаларың.

- Иң истә кала торган сүзләр – җыр сүзләре. Башка ике җырның юллары килә. Беренчесе «Сәләт-Гайрәт 2016» җырындагы сүзләр: «Сизәсеңме, без хәзер бәхетле?». Ә икенчесе Альберт Нурминскийның «Амин Асин Абез» җырыннан: «Кайчан да булса барысы бетәчәк һәм безнең урынга бүтән кешеләр киләчәк». Ә яраткан татар сүзләрем, мөгаен, «мәхәббәт», «дәрт», «мизгел»дер.

– Сәлкешләргә теләгең.

– Дөрес максатлар куярга һәм, бөтен авырлыкларны җиңеп, аларга ирешергә!

тулысынча укырга

Ләйсән Гобәйдуллина

«Сәләт-Батыр 2018» сменасы өлкән әйдаманы

– Син Сәләт берләшмәсенә ничек килеп кердең?

– Сәләткә мин беренче тапкыр кечкенә чагымда, 2008-нче елда килдем. «Сәләт-КИР» аланы иде ул (бүгенге «Сәләт-Санак»). Кызганыч, тик ул вакытта мин Сәләт берләшмәсе бирә торган мөмкинлекләрнең колачын аңлап бетерә алмаганмын. Мөмкин булса, тагын һәм тагын шул аланга әйләнеп кайтыр иде!

– Сәләттә иң яраткан өч сменаң.

– «Сәләт-КИР 2008», «Сәләт-Батыр 2013», «Сәләт-Батыр 2018»

– Ул вакыттагы Сәләт белән бүгенге Сәләтне чагыштыр әле.

– Мин беренче тапкыр Сәләткә аяк баскан көннән соң, берләшмә искиткеч зур үзгәрешләр кичерде. Бүген Сәләт берләшмәсе дөньяның төрле почмагында яшәүче балаларга, иҗади һәм интеллектуаль мөмкинлекләрен үстерү өчен, бик зур мөмкинлекләр бирә. Элегрәк аланнарда һәм төрле проектларда башлыча Татарстан балалары катнашса, хәзер география киңәйде һәм бу бик шатлыклы күренеш.

– Сәлкеш – ул...

– Ул – бәлки әле үзе дә белеп бетерми торган һәм Сәләт һичшиксез ачарга ярдәм итәчәк бихисап мөмкинлекләр һәм сәләтләр чишмәсе.

– Әйдаман – ул...

– Әйдаман – ул сәлкешкә үрнәк, алан дәвамында да, олы тормышка чыккач та балалар үрнәк итеп карый торган шәхес.

– Беренче әйдаманнарыңны хәтерлисеңме?

– Хәтерлим! Алар иң шәпләре иде – Алсу апа Гатауллина һәм Ләйсән апа Хафизова.

– Ничек уйлыйсың, безгә нинди проектлар җитми?

– Бүген безнең берләшмәдә балалар үзләрен төрле яклап ача һәм мөмкинлекләрен үстерә ала торган проектлар бихисап. Шуңа күрә нәрсә җитми икәнен әйтүе дә кыен. Спорт юнәлешенә күбрәк игътибар бирергә кирәктер, мөгаен.

– Син Сәләттә нинди эш башкарасың?

– Хәзер мин «Сәләт-Батыр» аланының өлкән әйдаманы.

– Сәләттән кала нинди кызыксынуларың бар?

– КФУның юридик факультетында укыйм. Университетымны бик яратам, аның студенты булуым белән горурланам. Укудан тыш кул эшләре белән шөгыльләнергә яратам, чигү, төрле тәмле ризыклар пешерү белән мавыгам.

– Татарча иң яраткан сүзләрең яки фразаларың.

- «Әни» – иң матур һәм җылы сүз! «Бернигә дә карамый, мәхәббәтсез яшәү ярамый!»

– Сәлкешләргә теләгең.

– Беркайчан да кулларыгызны төшермәгез, борыныгызны салындырмагыз! Сезнең кулларда шулкадәр мөмкинлек бар! Аларны кулланып калырга ашыгыгыз!

тулысынча укырга

Гүзәл Шәрипова

«Сәләт-Саба 2018» сменасы өлкән әйдаманы

– Син Сәләт берләшмәсенә ничек килеп кердең?

– Сәләт дөньясына 2011-нче елда дус кызым белән «Сәләт-Санак» аланына баргач килеп кердем. Шуннан соң бер генә җәйнең дә Сәләтсез үткәне юк.

– Сәләттә иң яраткан өч сменаң.

– Әлбәттә, һәр алан үзенчә шәп. Минем өчен беренче урында – «Сәләт-Саба», аны үзем өчен яңа яктан ачам. «Сәләт-Биләр каласы» «Сәләт-Имәнкәй» «Сәләт-Шәхес» шулай ук күңелемә бик якын.

– Ул вакыттагы Сәләт белән бүгенге Сәләтне чагыштыр әле.

– Элек Сәләт җылылык, аралашу урыны иде, җәйге аланнар эшчәнлегенә күбрәк игътибар бирелде, ә хәзер Сәләт – бик тиз үсә, замана тенденцияләре артыннан ияреп бара торган ел дәвамында эшләүче система. Элек булган якларына өстәп, хәзер Сәләттә белем бирү һәм шәхесне үстерү якларына да игътибар арта. Һәм, әлбәттә инде, масштаб бермә-бер үсте. Быел, мәсәлән, 6 форум булачак – бу да шуңа дәлил.

– Сәлкеш – ул...

– Сәләт дөньясы аның тирәсендә әйләнә торган шәхес. Бөтенесе дә сәлкешләрнең кызыксынуларын һәм омтылышларын күздә тотып эшләнә.

– Әйдаман – ул...

– Сәлкешнең үсеш юлында юл күрсәтүче һәм ярдәм итүче шәхес. Аның дустанә һәм игътибарлы мөнәсәбәте Сәләт дөньясына кереп китәргә, үзеңне анда яхшы хис итәргә булыша.

– Беренче әйдаманнарыңны хәтерлисеңме?

– Әлбәттә! Беренче әйдаманнарым Туран абый Гатауллин белән Венера апа Галимова иде.

– Ничек уйлыйсың, безгә нинди проектлар җитми?

– Ел дәвамында спорт рухын яшәтү мөмкинлеге булса, шәп булыр иде. Бу юнәлештә эшләргә буладыр дип уйлыйм.

– Син Сәләттә нинди эш башкарасың?

– Төп эшем һәрвакыт җәйге аланнар белән бәйле иде (әйдаман, методист). Ел дәвамында – җәйге сменаларга әзерләнү, җәен – әйдаман, көзен – нәтиҗәләр ясау, «Әйдаманнар ярышы»нда катнашучы йә куратор буларак катнашу.

– Сәләттән кала нинди кызыксынуларың бар?

– Хәзерге вакытта мин КФУның Идарә, икътисад һәм финанслар институтында «Бухгалтер хисабы, анализ һәм аудит» белгечлеге буенча бакалавриатны тәмамлыйм. Шул ук вакытта «Һөнәри коммуникация өлкәсендә тәрҗемәче» белгечлеген үзләштерәм, бөтен көчемне киләчәктә яхшы белгеч булуга һәм үз эшемне яратып башкаруга юнәлдерәм.

– Татарча иң яраткан сүзләрең яки фразаларың.

 - Мәхәббәт кешене матур итә. Онытылмаслык мизгелләр синнән тора. Яңа үрләргә омтыл!

– Сәлкешләргә теләгең.

Күбрәк яңа нәрсә белергә тырышыгыз, яхшыга омтылыгыз, һәрвакыт үзегезгә ышаныгыз һәм һәрвакыт елмаеп, һәр көннән ямь табып яшәгез!
тулысынча укырга

Алинә Лобанова

«Сәләт-Азнакай 2018» сменасы өлкән әйдаманы

– Син Сәләт берләшмәсенә ничек килеп кердең?

– Ансамбль белән конкурста җиңгәннән соң, Азнакай шәһәренең музыка мәктәбе безгә лагерьга юлламалар бүләк итте. Ул вакытта без әле кая барганыбызны да белми идек. Ләкин «Сәләт-Азнакай»га килүгә, иң яхшы сменага эләккәнебезне аңладык.

– Сәләттә иң яраткан өч сменаң.

– «Сәләт-Азнакай», «Фәнсар» мәктәбе, «Сәләт-Санак».

– Ул вакыттагы Сәләт белән бүгенге Сәләтне чагыштыр әле.

– 2011-нче ел белән бүгенге көнне чагыштырып карасак, Сәләт бик зур сикереш ясады. 2011-нче елда бер фестиваль генә уздырылса, хәзер халыкара дәрәҗәдәге форумнар оештырыла. Аудиториясе 5000 кешегә кадәр үсте. Технологияләр, яңа мөмкинлекләр барлыкка килгән саен балалар да үсә бара.

– Сәлкеш – ул...

– Бик күп сәләтләре булган һәм ул сәләтләрен үстерергә, башкалар белән дә уртаклашырга әзер булган кояш нуры.

– Әйдаман – ул...

– Сәлкешнең якын дусты – һәрвакыт ярдәм итә, юл күрсәтә, терәк була.

– Беренче әйдаманнарыңны хәтерлисеңме?

– Әлбәттә, хәтерлим. Ул кешеләрне онытып булмый – Ләйсән апа Сабитова белән Гөлнара апа Хәялиева.

– Ничек уйлыйсың, безгә нинди проектлар җитми?

– Бу сорауга җавап бирү кыен. Сәләттә хәзер бөтен өлкәне колачлый торган проектлар да бар.

– Син Сәләттә нинди эш башкарасың?

– Бу җәйдә «Сәләт-Азнакай» аланына өлкән әйдаман булып барам.

– Сәләттән кала нинди кызыксынуларың бар?

– Биим, баскетбол уйныйм, фотога төшерергә яратам.

– Татарча иң яраткан сүзләрең яки фразаларың.

– Тәхәллүс. Бу сүз сәлкеш вакытта ук күңелгә кереп калган иде. Аның үз сере бар.

– Сәлкешләргә теләгең.

– Син – бу җәйнең бәхетле тарихы! Һәр тарих мизгелләрдән тора. Сәләтнең иң яхшы сменаларында үз мизгелеңне тап! (Елмая)

тулысынча укырга

Рәзилә Садриева

«Сәләт-Эшмәкәр 2018» сменасы өлкән әйдаманы

- Сәләт оешмасына ничек килеп эләктең?

- 2011-нче елны апам «Сәләт-Раушан» аланына барырга тәкъдим иткән иде, ләкин, кызганыч, яшем аркасында анда бара алмадым. Ул елны «Сәләт-Биләр каласы» сменасына бардым һәм бер дә үкенмәдем.

- Сәләтнең 3 иң яраткан сменасы.

- «Сәләт-Эшмәкәр», «Сәләт-Тел», «Фәнсар» мәктәбе сменалары.

- Бүгенге һәм элекке Сәләтне чагыштырып нәрсә әйтә аласың?

- Сәләт инде күптәннән республика дәрәҗәсеннән үсте. Аны чынлыкта да үсеш өчен дөньякүләм мәйдан дип була. Оешма проектлары күп илләрдә тормышка ашырыла, ә менә Сәләт вәкилләре, гомумән, бөтен дөнья буйлап яши. Моннан чыгып, күп кенә кешенең Сәләт принциплары буенча яшәүне әйтеп була.

- Сәлкеш ул – ...

- Сәлкеш – Сәләткә яңа мөмкинлекләр артыннан барган шәхес.

- Әйдаман ул – ...

- Әйдаман ул – әни, әти, остаз һәм иң мөһиме, дус! Әлеге кешедән һәрвакыт максималь рәвештә ярдәм көче чыгып тора.

- Үзеңнең беренче әйдаманнарыңны хәтерлисеңме?

- Хәтерлим. (Елмая). «Сәләт-Биләр каласы 2011» сменасының иң шәп әйдаманнары – Айгөл апа һәм Рәмзис абый.

- Синеңчә, безгә нинди проектлар җитми?

- Әлеге сорауга җавап бирергә кыенсынам. Оешмада барысы да бар шикелле.

- Безнең оешмада нәрсә белән шөгыльләнәсең?

- Бүгенге көнгә мин әйдаман, мәдәни өлкәдә оештыручы. Бу елны үземне шулай ук яңа рольдә – өлкән әйдаман ролендә сыныйм.

- Сәләттәге булган эшчәнлектән тыш, нәрсәләр белән шөгыльләнәсең?

- Бу елны университетны тәмамлыйм. Шуңа күрә әлегә укыйм, диплом эшен язам.

- Татар телендә булган иң яраткан сүзләрең яки гыйбарә.

- Кәеф ничек? Сәләттә мәхәббәт, Бу зур бәхет түгелме?

- Сәлкешләргә теләкләрең.

- Сәлкешләр, Сәләттә үткәргән һәр минутыгызның кадерен белегез. Сәләт сезгә көч, дәрт бирә, ә сез аңа әлеге көчне икеләтә кайтарасыз.
тулысынча укырга

Сабина Борһанова

«Сәләт-Тел» сменасы өлкән әйдаманы

- Сәләт оешмасына ничек килеп эләктең?

   - Югары сыйныфларда укучы кызлар ел саен Сәләт аланнарына барып, «Вконтакте» социаль челтәренә аннан фотосурәтләр урнаштыра иде. Ләкин, мин бу оешма турында берни дә белми идем. Шулай бер көнне Камилә Сөләйманова мине, аның белән бергә «Сәләт-Санак» аланына барырга чакырды. Бирегә 2012-нче елны барып кайттым һәм шуннан соң башка, «Сәләт-Шәхес» сменасына да әти-әнидән путевка алдырттым. (Елмая)

 - Сәләтнең 3 иң яраткан сменасы.

   - Барлык сменаларны да бик яратам! Аеруча, мин булганнарын. Тик, күңелгә иң ятканы – «Сәләт-Тел», чөнки бирегә мин беренче тапкыр әйдаман булып бардым.

- Бүгенге һәм элекке Сәләтне чагыштырып нәрсә әйтә аласың?

   - Беркемгә дә сер түгел, оешмабыз замана белән бер адымда бара, үзенә тагын да күбрәк сәләтле балалар җәлеп итә. Үзең әлеге оешмада бала ролендә булганда, шундый рәхәт! Барлык чараларны, уеннарны һ.б нәкъ менә синең өчен генә әзерлиләр! Ләкин, хәзер, башка вазыйфаны үтәгәндә, сиңа карата балаларның мәхәббәте белән бер нәрсәне дә чагыштырып булмый!

- Сәлкеш ул – ...

   - Сәлкеш ул – берүк вакытта укучы да, укытучы да! Чыннан! Балалар мине һәрвакытта да илһамландыра! Алар өчен барысын эшлисе килә!

- Әйдаман ул – ...

   - Әйдаман ул – үрнәк һәм әлбәттә, зур җаваплылык! Ул – берүк вакытта ата-ана да, дус та, абый, апа да, укытучы да.

   - Үзеңнең беренче әйдаманнарыңны хәтерлисеңме?

   - Әлбәттә, хәтерлим. Алар бит беренче. (Елмая) Алсу апа Салаватова һәм Марат абый Исмәгыйлев. Минем өчен алар һәрвакытта да идеаль булып тоелды.

   - Синеңчә, безгә нинди проектлар җитми?

   - Бу сорауга шунда ук җавап биреп булмый. Минемчә, Сәләттә бөтен нәрсә дә бар!

- Безнең оешмада нәрсә белән шөгыльләнәсең?

   - Хәзерге вакытта мин «Сәләт-Олимп» сменасында. Җәй көнне «Сәләт-Тел» аланына өлкән әйдаман булып барам. Тагын берничә смена белән бәйле булачакмын, ләкин монысы, әлегә, сер булып торсын. (Елмая)

   - Сәләттәге булган эшчәнлектән тыш, нәрсәләр белән шөгыльләнәсең?

   - Дизайнер һөнәрен үзләштерәм, рәсемнәр ясыйм. ReQuizit дип аталган интеллектуаль уенның оештыручысы вазыйфасын үтим. СТЭМда да катнашырга яратам. Күптән түгел төрле конкурсларда катнаштык, алар арасында Студентлар язы.

- Татар телендә булган иң яраткан сүзләрең яки гыйбарә.

   - Иң яраткан сүзем «кызым», чөнки әти белән әни аны һәрвакытта да мәхәббәт хисе белән әйтәләр.

   - Сәлкешләргә теләкләрең.

   - Беркайчанда искиткеч булып калыр өчен мөмкинлекне ычкындырмагыз! Яратыгыз, рәхмәтләр әйтегез, изге гамәлләр кылыгыз! Моның барысы да сезгә яхшылык булып кире кайтачак! 

тулысынча укырга

Ләйсән Миңнулина

Татар телендә узучы «Безнең фикер» дискуссион клуб җитәкчесе

- Сәләт оешмасына ничек килеп эләктең?

- Сәләттә мин 2010-нчы елдан, һәм хәзерге вакытта «Безнең Фикер» проектының җитәкчесе вазыйфасын башкарам. Шул ук елдан башлап сәлкеш буларак төрле аланнарда булганым бар: иң беренче сменам – «Сәләт-Шәхес», соңыннан «Сәләт-Раушан», «Сәләт-Санак», «Сәләт-Тел».
Әйдаман булып «Болгар-Туган Тел» Форумына, «Сәләт-Осталар бистәсе» сменаларына барганым бар. Башка аланнарга да укытучы, кунак, дебатлар үткәрүче кунак булып баргаладым.

Оешмага, гомумән, ялгыш килеп эләктем. Җәй ахырында әнием гәҗиттә әлеге оешма турында язма укып, мине беренче тапкыр «Сәләт-Шәхес» аланына җибәрде.

- Сәләтнең 3 иң яраткан сменасы.

- Истә калганнары, әлбәттә, иң беренче сменаларым: сәлкеш буларак барган «Сәләт-Шәхес», әйдаман буларак барган «Сәләт-Осталар Бистәсе, укытучы ролендә барган «Сәләт-Яр Чаллы».

- Бүгенге һәм элекке Сәләтне чагыштырып нәрсә әйтә аласың?

- Әлеге мохиткә 2010-нче елд эләгеп, аның масштаблары шуның кадәр зур булганына кайвакыт ышанып бетә алмый идем. Сәләт Форумына барып кайткач, биредә шактый күп олимпиадниклар, сәләтле, иҗади балаларны күргәч, бөтенләй шаккаттым! Әлеге сәләтле балалар, яшьләр белән бер рәттә булу минем бик нык илһамландырды. Хәзер инде Сәләтнең масштаблары елдан-ел күбрәк артканын, һишчиксез, аңлыйм. Бу елны Биләрдә 6 Сәләт Форумының үтүе моңа турыдан-туры дәлил.

- Сәлкеш ул – ...

- Сәлкеш ул – дөнья үсешенә ярдәм итүче, җәмгыятьне яхшыртучы корал.

- Әйдаман ул – ...

- Әйдаман – әлеге корал белән эшләүче, аны игътибарда тотучы.

- Үзеңнең беренче әйдаманнарыңны хәтерлисеңме?

- Әлбәттә, беренче әйдаманнарымны хәтерлим! Альбина апа Йосыпова һәм Айдар абый Галимуллин. Без хәзер дә аралашабыз, социаль челтәрләрдә бер-беребезне карап барабыз. (Елмая)

   - Синеңчә, безгә нинди проектлар җитми?

- Башымда «О, Сәләттә бу әйбер барлыкка килсә, шәп булыр иде» дигән фикер туа гына, оешмада аны шунда ук тормышка ашыралар. Кызык. Ләкин, бу чынлыкта да шулай. Җитди булсак, экология белән, гомумән, Сәләт Йорты белән бәйле фикерләр, идеяләр бар. Дөресен генә әйткәндә, Биләрдә булганда тортыклы үсешнең 17 максатлары белән илһамландым.

- Сәләттәге булган эшчәнлектән тыш, нәрсәләр белән шөгыльләнәсең?

- Сәләттән тыш, яшьләр дипломатиясе академиясенең БМО Клубы өлеше булам. Шунда ук балалар белән тыгыз эшчәнлек алып барам. Укуда да тикшеренү эшләре белән шөгыльләнәм.

Фән һәм кызыксынучанлык мине һәрвакытта да үзенең күп сораулары белән кызыксындырды. (Елмая)

- Татар телендә булган иң яраткан сүзләрең яки гыйбарә.

- Яратакан сүзләрем: Президентыбыз сүзләре: «Без булдырабыз!»
Директорым сүзләре (мәктәптән бирле хәтерлим): Безгә жиңгү кирәк! («Җиңү» сүзен ул һәрвакытта да Г хәрефе белән әйтә иде)


- Сәлкешләргә теләкләрең.

- Минем теләкләрем сәлкешләргә генә түгел, барлык проект, алан катнашучыларына юнәлтелгән булачак. Дуслар, үсеш өчен, башка ил вәкилләре белән аралашу өчен мөмкинлек булса, аны кулыгыздан ычкындырмагыз! Барлык проектларда катнашыгыз!

тулысынча укырга

Илнур Кашапов

«Сәләт-Саба 2018» сменасы директоры

- Сәләт оешмасына ничек килеп эләктең?

- 2008-нче елны беренче тапкыр бала буларак «Cәләт-Кол Шәриф оныклары» белән берлектә Биләрдә үтүче форумга килдем. Әлеге мохиткә эләккәч, шунда ук бу җирнең миңа бик якын икәнен, монда булырга теләгәнемне аңладым.

- Сәләтнең 3 иң яраткан сменасы.

- Иң яратканам сменаларым ул – «Сәләт-Чаллы», «Сәләт-Олимп» . Иң беренче тапкыр Яр Чаллыда үтүче «Cәләт-Кол Шәриф оныклары» сменасында булып кайткач, киләсе Сәләт тормышымны да Чаллы шәһәрендә үтүче сменаларда күрдем.

- Бүгенге һәм элекке Сәләтне чагыштырып нәрсә әйтә аласың?

- Күбесе күргәнчә, Сәләт замана белән бер адымда бара. Ләкин, шуңа да карамастан, ул хәзер дә үзендә гаилә җылылыгын һәм бердәмлек көчен саклый!

- Сәлкеш ул – ...

- Сәлкеш ул – без булдырырга теләгән яшьлек эталоны. Без аның өчен иҗат иткән һәм иҗат итәчәк берәмлек.

- Әйдаман ул – ...

- Әйдаман ул – аерым бер яшәү рәвеше. Сәлкешләр өчен чын үрнәк.

- Үзеңнең беренче әйдаманнарыңны хәтерлисеңме?

- Әлбәттә, беренче әйдаманнарымны, хәтта, бер система булып эшли торган команданы хәтерлим. Аларның һәрберсе дә зур механизмның бер детале иде. Үземнең «Сәләт-Саба» командасында да шундый система, бердәм механизмны булдырасым килә.

- Синеңчә, безгә нинди проектлар җитми?

- Балаларның холыгын ныгыта алучы спорт проектлары җитми дип саныйм. Бу җәйне «Сәләт-Саба» сменасы әлеге юнәлештә башлангыч нокта булачагына ышанам.

- Сәләттәге булган эшчәнлектән тыш, нәрсәләр белән шөгыльләнәсең?

- Хәзерге вакытта  үз-үземне төрле яктан үстерү, эчке дөньямны баету белән шөгыльләнәм.

- Татар телендә булган иң яраткан сүзләрең яки гыйбарә.

- Тирә-якка караганда, бар кешеләр күргәнне күрсәң дә, үзеңчә уйла.

- Сәлкешләргә теләкләрең.

- Әгәр дә сез Сәләттә икән, димәк сез иң бәхетле балалар! Шуны белегез!

тулысынча укырга

Наилә Батталова

«Сәләт-Гайрәт 2018» сменасы директоры

- Сәләт оешмасына ничек килеп эләктең?

- Минем иң беренче сменам «Сәләт-Санак», 2012-нче ел. Әлеге оешмага кушылырга танышым Илдар абый Хәйруллин киңәш итте. Соңыннан, нәкъ менә ул беренче кулдашыма, икенче елга өлкән әйдаманыма һәм мәңгелеккә яхшы дустыма әверелде. (Елмая)

- Сәләтнең 3 иң яраткан сменасы.

- Әлбәттә, иң яраткан, якын иткән сменам «Сәләт-Гайрәт». Монда мин беренче тапкыр әйдаман, өлкән буларак үземне күрсәттем һәм җәен, ниһаять, директор булып барачакмын.

Икенчесе – «Сәләт-Шәхес». Чөнки биредә ШТК, кабатланмас «Йолдызлы» мохите, күп кызыклы шәхесләр. Шулай ук балачактан яратылган «Сәләт-Рухият» сменасын аерып әйтә алам.

- Бүгенге һәм элекке Сәләтне чагыштырып нәрсә әйтә аласың?

- Шәхсән минем өчен, Сәләт һәрвакытта да иҗат, үсеш, дәрт, үзенчәлекле мохит бердәмлеге. Еллар үткән саен, бу бердәмлек югалмый. Киресенчә, ныгая гына бара. Әлбәттә, оешмабыз гел үсә бара һәм бү үз чиратында, безне шатландыра, куандыра.

- Сәлкеш ул – ...

- Сәлкеш ул – алмаз. Кайберләре шунда ук ялтырый, бүтәннәренә остаз куллары һәм вакыт таләп ителә. Ләкин сәлкешнең балкый торган күзләрен, аңлаучы карашын күрмичә калу мөмкин түгел.

- Әйдаман ул – ...

- Әйдаман ул – илһамландыручы. Әйдәп баручы, аңлый, ярата, дәрте белән уртаклаша торган кеше. (Нәкъ менә шул остаз)

- Үзеңнең беренче әйдаманнарыңны хәтерлисеңме?

- Әлбәттә! Мин, хәтта, үземнең беренче төркемемне дә хәтерлим – #алтынчытөркем ! Минем иң беренче әйдаманнарым – Алсу апа Сөләйманова һәм Марат абый Исмагыйлов. Алар – чиксез гайрәт, зур мәхәббәт һәм җылылык хисе кушылуы.

- Синеңчә, безгә нинди проектлар җитми?

- Белгәнебезчә, Сәләт зур адымнар белән алга таба атлый һәм биредә, һәрбер кеше дә үзенә якын булган юнәлешне таба ала. Шәхсән миңа, бик тә «Сәләт»нең ШТК лигасы ошый иде. Әлеге лигадан үзләрен республика дәрәҗәсендә һәм аннан читтә таныта торган кызыклы командалар тупланды. Шуңа күрә, әлеге проектның үсүен, үзенә яңа вәкилләр җәлеп итүен телим.

- Сәләттәге булган эшчәнлектән тыш, нәрсәләр белән шөгыльләнәсең?

- Хәзерге вакытта Рәсәй Дәүләт гадел хөкем университетын тәмамлыйм, җырлыйм, биим һәм ШТКда уйныйм.

- Татар телендә булган иң яраткан сүзләрең яки гыйбарә.

- Илһам, вәгъдә, гайрәт.

- Сәлкешләргә теләкләрең.

- Үзегезгә рәхәт булган мохиттән чыгырга курыкмагыз! Үзегезне һәрвакыт ниндидер яңа юнәлешләрдә сынап карагыз. Һәрбер мизгелнең кадәрен белеп, елмаеп яшәгез!

тулысынча укырга

Диләрә Кәримуллина

«TALKыш калеве» инглиз телендә узучы дискуссион клубының җитәкчесе

- Сәләт оешмасына ничек килеп эләктең?

- 2013-нче елда абыем Таһир Кәримуллин каникулларга «Сәләт-Раушан» аланына барды. Сменадан, ул бик илһамланган, яхшы хис-кичерешләргә бай булып кайтты. Мине бу бик тә кызыксындырды. Шуңа күрә, 2014-нче елда мин дә әлеге аланга барырга булдым. Һәм шуны әйтәсем килә – бер дә үкенмим! (Елмая)

- Сәләтнең 3 иң яраткан сменасы.

- «Сәләт-Раушан», «Сәләт-Раушан» һәм тагын бер тапкыр «Сәләт-Раушан». Минем башка бер аланда да булганым юк. (Көлә)

- Бүгенге һәм элекке Сәләтне чагыштырып нәрсә әйтә аласың?

- Сәләттә мин бары тик 4-нче генә ел. Шуңа күрә, элек оешманың нинди булганын, кызганычка, әйтә алмыйм. Ләкин, аның прогресс белән бер адымда барганын күрәм! Сәләтнең дөнья буйлап таралганын бик телим!

- Сәлкеш ул – ...

- Гамьсез кеше.

- Әйдаман ул – ...

- Нәтиҗәлек.

- Үзеңнең беренче әйдаманнарыңны хәтерлисеңме?

 -  Әлбәттә! Роберт абый һәм Эльза апа. Ләкин, ул вакытта мин бик оялчан идем, һәм алар белән бик аз аралашуыма мин нык үкенәм. (Моңсуланды)

- Бүгенге көндә Сәләттә нәрсә белән шөгыльләнәсең?

- Хәзерге вакытта мин «TALKыш калеве» дип исемләнгән инглиз телендә узучы дискуссион клубының җитәкчесе вазыйфасын башкарам.

- Синеңчә, безгә нинди проектлар җитми?

- Сәләттә төрле илләр биюләре дәресләре барлыкка килсә, бик шәп булыр иде дип уйлыйм.

- Сәләттәге булган эшчәнлектән тыш, нәрсәләр белән шөгыльләнәсең?

- Әлеге оешмадагы эшчәнлектән тыш, үземне актив рәвештә студент тормышында күрсәтергә тырышам, факультетымда студентлар фәнни җәмгыяте җитәкчесе ролен башкарам. Төрле бәйгеләрдә дә катнашырга яратам.

- Татар телендә булган иң яраткан сүзләрең яки гыйбарә.

- Талкыш калеве, Сәләт, мәхәббәт.

- Сәлкешләргә теләкләрең.

- Барыгызга да үзегезне һәм үз урыныгызна табарга телим!

 

тулысынча укырга